Xəzər Universitetinin Nəşriyyatında yeni “Khazar Journal of Science and Technology” elmi jurnalının (“Xəzər Elm və Texnologiya Jurnalı”) ilk sayı (Vol 1, N1, 2017) çapdan çıxmışdır.

“Xəzər Elm və Texnologiya Jurnalı” riyazıyyat, kimya, biologiya, yer elmləri, kompyuter elmləri, tibb və mühəndislik sahələrində orijinal və ən yeni tədqiqatların mənbəyi olacaq.

Jurnalın baş redaktoru Xəzər Universitetinin Təsisçisi, Direktorlar və Qəyyumlar Şurasının Sədri Professor Hamlet İsaxanlıdır. Jurnalın redaksiya heyətinə müxtəlif elm sahələrini, universitetləri və ölkələri təmsil edən mütəxəssislər daxildir (ABŞ, Çin, İran, İordaniya, Malayziya, Pakistan, Yaponiya).

Yeni jurnal bütün istifadəçilər və qurumlar tərəfindən onlayn rejimdə ödənişsiz oxuna bilər. Jurnalın maliyyə dəstəyi tam olaraq Xəzər Universitetinin nəşriyyatı tərəfindən verilir. Jurnalda məqalə çap etmək ödənişsizdir.  

Jurnalın elektron versiyası ilə bu link vasitəsilə tanış olmaq olar: www.kjsat.com