2017-ci il iyulun 17-18-də hazırda Valensiya Politexnik Universitetinin koordinatroluq etdiyi Azərbaycan Universitetlərində Tədris və Təlimin Təkmilləşdirilməsi adlı ERASMUS + layihəsinin ilk idarəedici görüşü keçirildi.

Xəzər Universitetində keçən görüşdə həm Azərbaycandan (Xəzər Universiteti, Naxçıvan Dövlət Universiteti, Gəncə Dövlət Universiteti, Sumqayıt Dövlət Universiteti, Bakı Slavyan Universiteti, Azərbaycan Dillər Universiteti, Azərbaycan Dövlət Pedaqoji Universiteti, Azərbaycan Universiteti, Azərbaycan Respublikası Təhsil Nazirliyi), həm də Avropadan (Jyvaskyla Universiteti - Finlandiya, Debrecen Universiteti - Macarıstan, Valensiya Politexnik Universiteti - İspaniya, Vyana Tətbiqi Elmlər Universiteti - Avstriya, Qazi Universiteti - Türkiyə) olan tərəfdaş universitetlərin və Təhsil Nazirliyinin nümayəndələri iştirak edirdilər. Tədbirin rəsmi açılış hissəsində Xəzər Univeristetinin təsisçisi, Direktorlar və Qəyyumlar Şurasının sədri professor Hamlet İsaxanlı, Azərbaycan Respublikası Təhsil Naziriliyi Ali, orta və əlavə ixtisas sektorunun müdiri Dr.Sülhəddin Gözəlov, Valensiya Politexnik Universitetindən layihə koordinatoru Dr.Javier Orozco, Milli ERASMUS + ofisinin direktoru Pərviz Bağırov çıxış etdilər.

İki günlük görüş müddətində layihə çərçivəsində nəzərdə tutulmuş işlərin planı, maliyyə məsələləri, hər bir tərəfdaş universitetin layihədəki rolu və cavabdeh olduğu işlər, potensial risk və onların həll olunması yolları müzakirə olundu, 6 aylıq və bir illik səfər planları müəyyənləşdirildi. Nəzərə alındı ki, layihənin aparıcı universiteti kimi Xəzər Universiteti Azərbaycandan olan tərəfdaş universitetlərdə tədris və təlim sisteminin qurulması üçün iş planını

təqdim edəcək. Layihənin icrası haqqında ilk hesabatın 2017-ci il sentyabrın sonuna kimi təqdim olunması qərara alındı.

Layihənin xüsusi məqsədləri (1) tədris və təlim prosesinin pedaqoji və texnoloji ehtiyaclarını ödəmək üçün İnsan kapitalının İnkişaf etdirilməsi və (2) İnnovativ texnologiya, tədqiqatın, fəal öyrənmənin və Avropa universitetləri ilə uzunmüddətli münasibətlərin qurulması vasitəsilə Keyfiyyətli Tədris və Təlimin inkişaf etdirilməsi və təmin edilməsidir.

9 Azərbaycan və 5 Avropa tərəfdaş universitetlərinin birgə hazırladığı 3 illik layihənin büdcəsi 908.623 avrodur.

Layihənin birbaşa iştirakçıları doktorant tələbələr, tədqiqatçılar və akademik heyətin digər üzvləridir.