2017-ci il iyulun 6-da Xəzər Universitetinin rektoru Hassan Niknafsın sədrliyi ilə universitet Elmi şurasının cari dərs ilində son iclası keçirildi. İclasın gündəliyinə əsasən rektor 2016-2017-ci tədris ilinin ümumi yekunları haqqında çıxış edərək, əldə olunmuş uğurlardan və qarşıda duran vəzifələrdən danışdı. O, həmçinin, ilin yekunlarına görə bir qrup əməkdaşın – Təmir-tikinti şöbəsinin işçisi Piri Piriyev, İctimai əlaqələr və media üzrə direktor Əlövsət Əmirbəyli, Riyaziyyat departamentinin müəllimi Cavanşir Əzizov, Tarix və arxeologiya departamentinin müdiri Roza Arazova, İqtisadiyyat və menecment fakültəsi dekanının köməkçisi Samirə Mirzəyeva, İngilis dili və ədəbiyyatı departamentinin müəllimi Lidiya Həmidova, İnkişaf mərkəzinin direktoru Raziyə İsayeva və Azərbaycan dili və ədəbiyat departamentinin müdiri Vurğun Əyyubun təşəkkürnaməyə layiq görüldüyünü bildirdi və iştirak edənlərə təşəkkürnamələri təqdim etdi.
Universitetin prorektoru Məhəmməd Nuriyev Məzunlarla iş üzrə mərkəzin direktoru Baba Bayramlının Elmi şuranın tərkibinə daxil edildiyi və şuranın elmi katibi təyin olunduğu haqqında məlumat verdi.
Məzunluq haqqında fakültə dekanları Elza Səmədova, Cabir Xəlilov, Ceyhun Məmmədov və dekan müavini Vəfa Aslanovanın, dərs vəsaitlərinin və fənn proqramlarının çapa təqdim olunması haqqında Elmi Şuranın katibi Baba Bayramlının məlumatları dinlənildi və müvafiq qərarlar qəbul edildi.
Elmi Şuranın iclasında universitetin təsisçisi, Direktorlar və Qəyyumlar Şurasının sədri professor Hamlet İsaxanlı çıxış edərək, bir sıra məsələlərlə əlaqədar tövsiyələrini bildirdi. O, həmçinin, Direktorlar və Qəyyumlar Şurası sədrinin assistenti Sevda Salayevaya başqa işə keçməsi ilə əlaqədar uğurlar arzuladı və ona təşəkkürnamə təqdim etdi.
Elmi Şuranın iclasında cari məsələlər də müzakirə olundu.