2017-ci il iyunun 29-da Xəzər Universitetində Avrasiya Bilik Mərkəzi (ABM), Xəzər Universiteti və Natural Resource Governanceİnstitute-nin təşkilatçılığı ilə Təbii ehtyatların idarə olunması mövzusunda beynəlxalq təlim öz işinə başladı. Təlimdə Azərbaycan, Ukrayna, Qırğızıstan, Qazaxıstan, Tacikistan və Monqolustandan mütəxəssislər iştirak edirlər.

İyulun 7-dək davam edəcək beynəlxalq təlimin  ilk günü açılış mərasimi ilə başladı. ABM-in direktoru, professor İnqilab Əhmədov çıxış edərək, iştirakçıları salamladı və budəfəki təlimin nəzəri və təcrübi əhəmiyyətindən danışdı. Həmin gün iştirakçılara kursun ümumi icmalı barədə məlumat verildi, panellərdə “Təbii xammallara qiymətin ardıcıl olaraq yüksəlməsi prosesinin başa çatması: təsir və adaptasiya” mövzusu müzakirə olundu və sual-cavab sessiyası keçirildi, qruplarda təqdimatlar oldu.

Təlimin sonrakı günlərində “Kəşfiyyat, hasilat və lisenziyaların verilməsində şəffaflıq”, “Ekoloji və sosial məsrəflər”, “Vergiqoyma icmalı”, “Fiksal modelləşdirmə”, “Suveren fondlar”, “Gəlirlərin bölüşdürülməsİ”, “Dövlət məsrəfi”, “Özəl sektorun inkişafı”, “Antiböhran strategiyası” və digər mözular nəzəri və praktik cəhətdən öyrəniləcək.

Kursda təlimçi kimi ABM-in direktoru İnqilab Əhmədov, təlimçiləri Azər Mehdiyev, Fuat Rəsulov, tədqiqatlar üzrə məsul əməkdaşı Fərid Quliyev, Mərkəzi Asiya və Qafqaz üzrə regional koordinator Qalib Əfəndiyev, Monqolustan üzrə menecer Dorjdari Namxaycansan iştirak edirlər.

İyulun 6-da kurs işini bitirəcək və bağlanış mərasimi keçiriləcək.