2017-ci il iyunun 4-dən 11-dək Erasmus+PROMIG layihəsinin ikinci fazası çərçivəsində Almaniyanın Oldenburq Universitetində Xəzər Universitetinin İqtisadiyyat və menecment fakültəsinin dekanı Ceyhun Məmmədov və müəllimi Nicat Qarayev, Siyasi elm və beynəlxalq münasibətlər kafedrasının müdiri Muxtar Haciyev və müəlliməsi Zivər Hüseynova işgüzar səfərdə oldular. Səfərin məqsədi 2013-cü ildə TEMPUS/UNİMİG layihəsi çərçivəsindəCənubi Qafqaz universitetlərində yaradılmış Miqrasiya Araşdırma Mərkəzlərində və müvafiq magistratura proqramlarının tədrisində əldə edilən təcrübələri Əfqanıstanın Tabeş Universitetində yaradılması nəzərdə tutulan miqrasiya elmləri üzrə magistratura proqramının gələcək heyəti ilə bölüşmək və mövcud nailiyyətləri daha da təkmiləşdirməkdən ibarət idi.

Layihə zamanı əsas iş Tabeş Universitetinin müəllim və akademik heyəti ilə birlikdə həmin universitet üçün miqrasiya üzrə tədris proqramının hazırlanması, dizaynı və bu mövzu ətrafında gedən müzakirələrdən ibarət idi. Eyni zamanda, Almaniyanın miqrasiyanın idarə olunması və öyrənilməsi istiqamətində ixtisaslaşmış müəssisələri və qeyri-hökümət təşkilatları ilə də görüşlər keçirildi.

Səfər bütün iştirakçıların və müvafiq universitetlərin magistratura proqramında təhsil alan tələbələrin iştirakı ilə keçirilmiş konfransla yekunlaşdı. Konfransda növbəti mərhələ üçün miqrasiya sahəsində elmi araşdırmaların aparılması, bu araşdırmaların mövzuları, araşdırmalar zamanı yaranacaq data toplanması və analizlə bağlı çətinliklər və onların həlli istiqamətində müzakirələr aparıldı.

Xəzər Universiteti layihədə aktiv iştirak edən tərəfdaşdır və layihənin ikinci mərhələsində digər Universitetlər ilə əməkdaşlığı daha da genişləndirərək araşdırmalar sahəsində yeni nailiyyətlər əldə etməyə hədəflənmişdir.