2017-ci il mayın 24-də Xəzər Universitetinin Siyasi elm və beynəlxalq münasibətlər departamenti Fransanın Azərbaycandakı səfiri xanım Aureliya Buşeni son prezident seçkilərindən sonra Fransanın mövcud xarici siyasəti ilə bağlı müzakirələr aparmağa dəvət etmişdi. Səfir Buşe Fransada prezidentliyə namizədlərin seçki qabağı keçirdiyi kampaniyaların, onların xarici siyasətlə bağlı verdiyi vədlərin, o cümlədən, Fransada baş verən siyası proseslərin ümumi icmalını təqdim etdi.

Seminarda Fransanın Avropa və xarici, eləcə də, dünyanın fransız dilində danışan ölkələri ilə əlaqələri barədə, habelə, Dağlıq Qarabağ münaqişəsinin sülh yolu ilə həll olunması istiqamətində Fransanın siyasi münasibəti ilə bağlı suallar verildi.

Seminardan sonra səfir Aureliya Buşe Xəzər Universitetinin təsisçisi, Direktorlar və Qəyyumlar Şurasının sədri professor Hamlet İsaxanlı ilə görüşdü, Azərbaycan və Fransa ali təhsil müəssisələri arasında əməkdaşlıq münasibətlərinin qurulması istiqamətində mövcud imkanları müzakirə etdilər.