2017-ci il mayın 26-da Xəzər Universitetində “Açıq qapı” günü keçirildi. Bakının Yasamal rayonundakı176 saylı və Qaradağ rayonundakı 162 saylı məktəblərin XI sinif şagirdləri universitetin “Mərmər” zalına toplaşmışdılar. Zalda ixtisaslar və universitetdə fəaliyyət göstərən mərkəzlər (xarici əlaqələr, karyera, psixologiya, kitabxana-informasiya və s.) üzrə masalar qurulmuşdu.

Tədbiri universitetin Təhsil fakültəsinin dekanı Elza Səmədova  açaraq, şagirdlərə universitet haqqına ətraflı məlumat verdi. Onlar ixtisas və mərkəz masaları ətrafında əməkdaşlarla söhbət etdilər və suallarına ətraflı cavablar aldılar.

Şagirdlər Xəzər Universiteti haqqında videoçarxlara da baxdılar və onlara bukletlər paylanıldı.  “Mərmər” zalda universitetin dövlət sektorunda və özəl qurumlarda yüksək vəzifələr tutan məzunları haqqında nümayiş etdirilən stend şagirdlərdə böyük maraq doğurdu.

Qonaqlara konsert proqramı da təqdim olundu.

“Mərmər” zalda tədbir başa çatdıqdan sonra şagirdlər universitetlə tanış oldular. Elektronika, inşaat mühəndisliyi, biologiya, kompüter və s. laboratoriyalarda, Kitabxana-İnformasiya Mərkəzində şagirdlərə məlumat verildi və sualları cavablandırıldı.

Məktəblilər Xəzər Universitetindən xoş təəssüratla ayrıldılar.