2017-ci il mayın 8-dən 12-dək Xəzər Universiteti Beynəlxalq Əlaqələr Ofisinin koordinatoru Günay Fərzəliyeva Polşanın Varşava şəhərində Kozminski Universitetində Erasmus+ layihəsi çərçivəsində keçirilən Beynəlxalq İşçi Həftəsində iştirak etdi. Tədbirdə həmçinin Avstraliya, Belçika, Braziliya, Kanada, Çin, Xorvatiya, Çex Rspublikası, Gürcüstan, İndoneziya, Yaponiya Qazaxıstan, Malayziya, Yeni Zellandiya, Rusiya, Peru, Filippin, Serbiya. Ukrayna, Böyük Britaniya və ABŞ kimi ölkələrdən olan administrativ və akademik heyət nümayəndələri iştirak edirdilər.

Bu, Xəzər Universitetinin Kozminski Universitetində Beynəlxalq İşçi Həftəsində ikinci iştirakı idi. Bu ilin işçi həftəsi daha çox beynəlmiləlləşmənin effektiv idarə olunması yollarına həsr olunmuşdu. Tələbələrin gələcək iş həyatına hazırlanması, beynəlxalq tələbələrin universitet həyatına aktiv cəlb olunması, gələcək təlim metodları və digər məsələlər müzakirə olunanlar sırasında idi.

İşçi Həftəsində Günay Fərzəliyeva Xəzər Universiteti və onun beynəlmiləlləşdirmə strategiyası barədə təqdimatla çıxış etdi. O, həmçinin, tədbirdə iştirak edən universitetlərin nümayəndələri ilə görüşərək, mümkün əməkdaşlıq imkanlarını müzakirə etdi. Günay xanım həm də hazırda Kozminski Universitetində bir semestrlik mübadilə proqramı çərçivəsində təhsil alan Xəzər Universiteti İqtisadiyyat və menecment fakültəsinin iki bakalavr tələbəsi ilə də görüşdü.