2017-ci il mayın 12-də Xəzər Universiteti Tarix və arxeologiya departamentinin müəllimi Orxan Zamanovun Təhsil fakültəsi tarix ixtisasının tələbələri üçün təşkil etdiyi növbəti dərs İçərişəhərdə yerləşən Numizmatika muzeyində gerçəkləşdirildi. Dərs ekskurs xarakterili olması ilə bərabər, numizmatika üzrə mütəxəssis Qənirə Pirquliyevanın rəhbərliyi ilə keçirildi. Təhsil fakültəsinin tələbələrinə Azərbaycan numizmatikası, Şərqin pul dövriyyəsi, mübadilə və ticarət ilə bağlı geniş və maraqlı faktlardan bəhs olundu. Tələbələrin maraqlı sualları və şərhləri, dərsin keçirildiyi məkanın – Çin məscidinin özünəməxsus aurası və Qənirə xanımın əhatəli təqdimatı dərsin qavranmasına və yaddaqalan olmasına şərait yaratdı. Bu ekskursiyaya Şirvanşahlar sarayı yaxınlığında yerləşən Miniatür kitab müzeyinə qısa gəzinti də daxil idi. Orada tələbələr kitab incəsənəti və texnologiyası haqqında məlumatlandırıldılar. Mikroskopik ölçülü kitablar və dünyanın nadir muzeyində olmaq tarixçi tələbələr üçün çox maraqlı oldu.