Fevralın 11-12-də  “Dünya” məktəbində “Dünya” Məktəbi Model BMT Konfransı” keçirildi. Konfrans “Dünya” Məktəbi Şagird Birliyi və “Azəri Yurdu” Gənclər İctimai Birliyinin birgə təşkilatçılığı ilə təşkil olunmuşdu.  Konfransda şagirdlər, tələbələr və müxtəlif ixtisaslı şəxslər iştirak edirdilər.

Konfransın keçirilməsində məqsəd gənclərin diplomat kimi formalaşması və kommunikasiya, liderlik bacarıqlarının inkişaf etdirilməsidir. Konfrans üç komitədən ibarət idi: BMT-nin Baş Assambleyası;  BMT-nin Təhlükəsizlik Şurası; BMT-nin İqtisadi və Sosial Şurası. Konfransda “Terrora qarşı mübarizə”, “Türkiyədəki situasiya”, “Beynəlxalq miqrasiya və onun iqtisadi inkişafa təsiri” mövzularında müzakirələr aparıldı  və iştirakçılar böyük fəallıqla hər məsələyə aid qətnamə hazırladılar.

Fevralın 12-də konfransın  təntənəli yekun mərasimi keçirildi. Xəzər Universitetinin təsisçisi, Direktorlar və Qəyyumlar Şurasının sədri professor Hamlet İsaxanlı çıxış edərək, konfrans haqqında fikirlərini bölüşdü. Konfrans iştirakçılarına sertifikat, fəal iştirakçılara fərqlənmə sertifikatları təqdim olundu.

Konfransın işində “Dünya” məktəbinin həmtəsisçisi, Xəzər Universiteti Direktorlar və Qəyyumlar Şurasının müşaviri Nailəxanım İsayeva iştirak edirdi.