2016-cı il dekabrın 17-də Xəzər Universitetində BP, Iteca Caspian, Caspian Event Organizers, EY şirkətləri və “Kainat” Tədris Mərkəzinin birgə sponsorluğu ilə həyata keçirilən “Gələcəyini Qur!” Gəncliyə Dəstək layihəsinin “Elm” mövzusunda tədbiri keçirildi. Tədbirdə layihənin iştirakçıları olan Bakı şəhərinin və Salyan rayonunun müxtəlif məktəblərinin 11-ci sinif şagirdləri Xəzər Universiteti ilə tanış olmaqla yanaşı, dəyərli məlumatlar əldə etdilər.

Xəzər Universiteti Beynəlxalq əlaqələr şöbəsinin direktoru Turan Cəfərova tədbiri açaraq, iştirakçıları salamladı, layihə haqqında ümumi məlumat verdi. Sonra layihənin rəhbəri Bəhruz Hidayətzadə elmin vacibliyi, layihənin ədalət, sevgi, məsuliyyət kimi dəyərləri haqqında çıxış etdi.

İradəetmə və tələbə işləri üzrə prorektor İsaxan İsaxanlı universitet haqqında ətraflı məlumat verdi. Xəzər Universitetinin məzunu, ADA Universitetinin müəllimi Rəşad İbadov şagirdlərin layihəyə marağını artırmaq üçün layihənin əhəmiyyətindən danışdı.

Çay fasiləsindən sonra Xəzər Universitetinin təsisçisi, Direktorlar və Qəyyumlar Şurasının sədri professor Hamlet İsaxanlının təsis etdiyi Avrasiya Akademiyası haqqında film nümayiş etdirildi. Sonra H.İsaxanlı “Elm” mövzusunda çıxış etdi. Xəzər Universitetində təhsil alan “Gələcəyini Qur!” lahiyəsinin məzunları çıxış etdilər. Xəzər Universitetinin amerikalı məzunu Marta Lauri çıxış edərək, tədbir iştirakçılarını dil öyrənməyə çağırdı. EY şirkətinin əməkdaşı Günel Fərəcova elm və cəmiyyət haqqında çıxış etdi. Sonra şagirdlər qruplara bölünərək, praktiki çalışmalar üzərində işlədilər.

Qeyd edək ki, “Gələcəyini Qur!” layihəsinin əsas məqsədi aztəminatlı ailələrdən olan yüksək bilik və bacarığa malik gənclərin həyatda uğur əldə etmələrinə dəstək və tövhə vermək və bununla Azərbaycan cəmiyyətinə yüksək intellekt və etik dəyərlərə malik sağlam düşüncəli gənclər qazandırmaqdır.

Layihə haqqında ətraflı məlumat bu linkdən əldə oluna bilər: http://geleceyiniqur.az/az/.