2016-cı il dekabrın 8-də Xəzər Universitetində Fövqəladə Hallar Nazirliyinin (FHN) təşkilatçılığı ilə “Həyat fəaliyyətinin təhlükəsizliyi tələbələrin gözü ilə” adlı tədbir keçirildi. Tədbir Bakı şəhərinin ali təhsil müəssisələrində tələbələrin insanların həyat fəaliyyətlərinin təhlükəsizliyi məsələlərinə baxışları ilə tanış olmaq, bu sahədə mövcud olan nailiyyətlər, problemlər və perspektivləri müzakirə etmək, fövqəladə halların qarşısının alınması və onların nəticələrinin aradan qaldırılması istiqamətində yeni fikirlər ortaya çıxarmaq məqsədilə təşkil olunmuşdu. Tədbirdə FHN-nin əməkdaşları ilə yanaşı, Azərbaycan Tələbə Gənclər Təşkilatları İttifaqının rəhbərliyi, ali təhsil müəssisələrinin tələbələri də iştirak edirdilər.

Tədbiri giriş sözü ilə Xəzər Universitetinin rektoru Dr.Hassan Niknafs açdı. Sonra FHN Bakı Regional Mərkəzinin rəis müavini polkovnik-leytenant Elnur Qasımov, Azərbaycan Tələbə Gənclər Təşkilatları İttifaqı Qeyri-Hökumət Təşkilatları ilə iş departamentinin direktoru Həsən Əliyev, Xəzər Universitetinin  İctimai Əlaqələr və Media üzrə direktoru Əlövsət Əmirbəyli tədbirin keçirilməsinin əhəmiyyətindən danışdılar.

Sonra FHN Bakı Regional Mərkəzinin əməkdaşlarının hazırladığı videofilmin təqdimatı oldu. Filmin təqdimatından sonra tələbələr –Emil Bayramov, Fatimə Qənbərli (Xəzər Universiteti); Mirramin Yusifov (FHN Akademiyası); İlahə Balakişiyeva (Azərbaycan Dillər Universiteti); Sozalı Qurbanov (Azərbaycan Dövlət İqtisad Universiteti); Ülvi Mirzəyev (Azərbaycan Kooperasiya Universiteti); Həyat Qarayeva (Bakı Dövlət Universiteti); Fərid Ələkbərli, Rauf Vəliyev (Azərbaycan Tibb Universiteti) müxtəlif mövzularda təqdimatlar keçirdilər.

Tədbirin sonunda tələbələrin sualları cavablandırıldı.