Noyabrın 21-də Xəzər Universitetində yubiley tədbiri keçirildi. Universitet rəhbərliyinin və əməkdaşların iştirak etdikləri tədbirdə universitetin baş mühasibi Kərim Kərimovun 80, Azərbaycan dili və ədəbiyyatı müəllimi Elza İsmayilovanın 60 (üzürlü səbəbə görə tədbirdə iştirak etmirdi)  və Elektronika və telekommunikasiya departamentinin müdiri Nuru Səfərovun 50 illik yubileyləri təntənəli şəraitdə qeyd edildi.

Tədbirn aparıcısı, Məzunlarla İş Mərkəzinin direktoru Baba Bayramlı yubilyarların həyat və fəaliyyəti haqqında qısa məlumat verdikdən sonra onlar haqqında universitetin Multimedia mərkəzi tərəfindən hazırlanmış slayd-şoular nümayiş olundu.

Universitetin təsisçisi, Direktorlar və Qəyyumlar Şurasının sədri professor Hamlet İsaxanlı, rektor Hassan Niknafs, prorektor Məhəmməd Nuriyev, Xəzər Universiteti Avropa və Orta Şərq Araşdırmaları Mərkəzinin direktoru Fərda Əsədov, İqtisadiyyat və menecment fakültəsinin dekanı İnqilab Əhmədov, Magistratura, doktorantura və elmi işələr bölməsinin müdiri Eldar Şahgəldiyev və İngilis dili və ədəbiyyatı departamentinin baş müəllimi Firəngiz Nəsirova çıxış edərək, yubilyarları təbrik etdilər, onlara uzun ömür, fəaliyyətlərində uğurlar arzuladılar.

Yubilyarlara gül dəstəsi, təbrik məktubu və hədiyyə təqdim olundu. Onlar yubiley tortunu kəsəndən sonra çıxış edərək, universitet rəhbərliyinə və iştirakçılara təşəkkürlərini bildirdilər.

Tədbirdə universitetin Musiqi və incəsənət departamentinin müdiri, pianoçu Zülfiyyə Sadığovanın müşayıəti ilə dövlət filarmoniyasının solisti, Xəzər Universirtetinin müəllimi Məhsəti Cabbarovanın ifasında mahnılar səsləndi, iştirakçılar rəqs edib, əyləndilər.