2016-cı il noyabrın 14-də Xəzər Universitetində tədqiqat seminarı (Research seminar/Journal Club) keçirildi. Seminarın birinci hissəsində KİM-nin Elektron informasiya xidmətləri bölməsinin müdiri Səidə Orucova Biologiya departamentinin doktorantları, tədqiqatçıları və müəllimləri üçün “Elektron resurslardan axtarış üsulları” mövzusunda növbəti təlimi keçirdi. Təlim elektron kataloq, onlayn verilənlər bazası və DSpace –elektron arxiv və bu resurslardan istifadə qaydalarına həsr olunmuşdu. Təlimin birinci hissəsində iştirakçılar bu resurslarla tanış oldular, ikinci hissəsində isə artıq əldə etdikləri məlumatlardan istifadə edərək, tapşırıqları yerinə yetirdilər.
Daha sonra Bioloji elmlər departamentinin doktorantı Pərvanə Baxşəliyeva Azərbaycanda və qonşu ölkələrdə yeni doğulmuşlar arasında fenilketonuriyanın mütasiyalarının genetik xüsusiyyətlərinin araşdırılması haqqında bir neçə məqaləni müqayisəli təhlil etdi.
Bundan sonra Bioloji elmlər departamentinin müdiri və Hüceyrə Patologiyası Tədqiqat Mərkəzinin rəhbəri Dr. İradə Xəlilova Avropanın “Cystic Fibrosis” jurnalında çapa qəbul edilən “Oksidləşmiş qlütation və sidik turşusu ağ ciyərin erkən kistik fibroz xəstəliyinin biomarkeri kimi” (“Oxidized glutathione and uric acid as biomarkers of early cystic fibrosis lung disease”) məqaləsini təqdim etdi və məqalədə təqdim edilən nəticələrin kistik fibroz xəstəliyinin erkən diaqnostikasında əhəmiyyətini qeyd etdi. Beləlilə, seminarda geniş müzakirələr aparıldı və yekunda növbəti seminar üçün digər doktorant tələbələrin iştirakı planlaşdırıldı.