“Bayraqları bayraq edən üstündəki qandır,

Torpaq əgər üstündə ölən varsa, Vətəndir!”

2016-cı il noyabrın 8-də “Dünya” məktəbinin müəllim və şagird kollektivi böyük ruh yüksəkliyi, vətənpərvərlik duyğusu ilə Dövlət Bayrağı Gününü qeyd etdilər. 

Məktəbin tarix fənni müəllimi Lamiyə Mədətli zamanın ağır sınaqlarından çıxmış bayrağımızın tarixindən söz açdı. Üçrəngli bayrağın rəmzləri, rəngləri, keçdiyi kəşməkəşli, şərəfli yoldan danışan çıxışçı bildirdi ki, bayrağımız şərəfimiz, adımız və yurdumuza, torpaqlarımıza sahibliyimizin rəmzidir.

Sonra “Dünya” məktəbinin səhnəsində böyük bəstəkar Fikrət Əmirovun “Qarabağ” musiqisi də ifa olundu,
müqəddəs bayrağımıza həsr olunan şeirlər səsləndirildi.

Balacalar tərəfindən ifa olunan milli rəqs hər kəsdə şən əhval ruhiyyə yaratmaqla bərabər, həm də milliliyimizə, ənənələrimizə bağlılığımızı bir daha xatırlatdı.

 Şagirdlər həyəcanlı idilər. Çünki himnin sədaları altında tədbirə başlamaq, bayrağa, vətənə, xalqa olan dərin məhəbbəti, sevgini həyəcansız ifadə etmək olmur.

Azərbaycan Xalq Cümhuriyyətinin yadigarı olan bu bayraq bizim azadlıq məfkurəmiz, arzu və idealımızdır.

Qeyd edək ki, Azərbaycan Respublikası üzərində dalğalanan müqəddəs dövlət bayrağımız ilk dəfə 1918-ci il noyabrın 9-da Bakıda Azərbaycan Xalq Cümhuriyyəti Nazirlər Şurasının yerləşdiyi binada qəbul edilmiş və qaldırılmışdır. Müstəqil Azərbaycanın dövlət bayrağındakı üç rəngin ifadə etdiyi və XX əsrin əvvəllərindəki milli istiqlal ideologiyamızın üç təməl prinsipini təşkil edən “Türkçülük, islamçılıq və müasirlik” düsturunun müəllifi görkəmli Azərbaycan mütəfəkkiri Əli bəy Hüseynzadədir.