Noyabrın 4-də Xəzər Universitetinin Mərkəz kampusunun “Dünya” konsert salonunda universitetin elm, ədəbiyyat və incəsənət xadimləri  ilə görüşlərdən ibarət ənənəvi  “Üz - üzə” layihəsi çərçivəsində Azərbaycan Bəstəkarlar İttifaqının katibi, Üzeyir Hacıbəylinin Ev Muzeyinin direktoru, Əməkdar incəsənət xadimi, bəstəkar Sərdar Fərəcov ilə görüş keçirildi. Tədbirdə Xəzər Universitetinin rəhbərliyi və əməkdaşları, Xalq artisti, bəstəkar Arif Məlikov, mədəniyyət və incəsənət xadimləri iştirak edirdilər. Tədbirin aparıcısı musiqişünas Nərgiz Kərimova idi.

Görüş bəstəkarın əsərlərindən ibarət zəngin konsert proqramı və çıxışlardan ibarət idi. Konsertdə Xəzər Universitetinin Kamera orkestri (konsertmeyster Nəsrin   Rzayeva),   Xəzər  Universitetinin   Musiqi  və  incəsənət  departamentinin  müdiri, dosent, pianoçu   Zülfiyyə   Sadıqova, pianoçu-müşayiətçi Sevinç Kərimova, Beynəlxalq  müsabiqələr  laureatları -  skripkaçılar   Ümid   Mustafayev, Nərgiz  Əliyeva, Zərrin  Əliyeva, kamançaçı  Mədinə  Şahgəldiyeva və müğənni Fəridə Məmmədova iştirak edirdilər.

Konsertdə bəstəkarın simli   alətlər  üçün   pyesləri, valsları, skripka və fortepiano üçün əsərləri, romansları ifa olundu. Bəstəkarın Xəzər Universitetinin təsisçisi, Direktorlar və Qəyyumlar Şurasının sədri, şair Hamlet İsaxanlının sözlərinə bəstələdiyi “Uşaqlıqda   qalan  bulud”   və “İstanbul  Boğaziçi” romansları müğənni   Fəridə Məmmədovanın ifasında ilk dəfə səsləndi.

Çıxış edənlər - musiqişünas, Bəstəkarlar İttifaqının katibi, professor Zemfira  Qafarova, teatr və kino rejissoru Rövşən Almuradlı, Qazi Universitetinin (Türkiyə) professoru, Əməkdar incəsənət xadimi, opera rejissoru, professor Əflatun Nemətzadə, Xalq artisti, tarzən Ramiz Quliyev Sərdar Fərəcovun yaradıcılıq xüsusiyyətlərindən ətraflı danışdılar.

Hamlet İsaxanlı çıxış edərək, universitetin “Üz- üzə” layihəsi haqqında geniş məlumat verdi, Sərdar Fərəcova universitetin təşəkkürnaməsini və Xəzər Universitetinin müəllimi, rəssam Afaq Kərimovanın çəkdiyi portretini təqdim etdi.

 Sonda Sərdar Fərəcov çıxış edərək, Xəzər Universitetinin rəhbərliyinə və iştirakçılara təşəkkürünü bildirdi.

“Üz-üzə” layihəsinin daha bir görüşü uğurla keçdi.