2016-cı il noyabrın 2-də İctimai Televiziyada yayımlanan “Açıq dərs” proqramının budəfəki mövzusu “Azərbaycanda elmin inkişafı və elmi nəşrlər problemi”nə həsr olunmuşdu. Proqrama ekspert kimi dəvət olunmuş Xəzər Universitetinin təsisiçisi, Direktorlar və Qəyyumlar Şurasının sədri professor Hamlet İsaxanlı mövzu ətrafında təhlil apardı, Sovet dövrü ilə müstəqillik dövrü arasındakı fərqləri vurğuladı, elm adamlarının, insitut və universitetlərin problemləri haqqında danışdı. O, nəzəriyyə və tətbiq arasındakı fərqlərə, elmi tədqiqatla sənaye və şirkətlər arasındakı əlaqələrə toxundu, elmi jurnallar, o cümlədən, “Xəzər Humanitar və Sosial Elmlər Jurnalı” (Khazar Journal of Humanities and Social Sciences) haqqında məlumat verdi, Xəzər Universitetində elmin inkişafı üzrə görülən işlərdən söhbət açdı. H.İsaxanlı elmin inkişafı üzrə dövlət siyasətinin vacibliyini qeyd edərək, qrantların qeydiyyatı və miqrasiya sahəsindəki mövcud problemlərə toxundu və yaranmış maneələrin aradan qaldırılması yolları barəsində danışdı.

Xəzər Universiteti, Bakı Dövlət Universiteti və Thomson Reuters agentliyinin intellektual mülkiyyət üzrə Bakı nümayəndəliyin də təmsil olunduğu “Açıq dərs” canlı proqramında elmin inkişafı üzrə qarşıda duran problemləri ətraflı şəkildə müzakirə edildi.