Bu günlərdə Xəzər Universitetinin Azərbaycan dili və ədəbiyyatı departamentinin müəllimi Qardaşxan Əzizxanlının redaktorluğu ilə iki kitab nəşr edilmişdir.

“Zəkioğlu” nəşriyyatında Xaqani Əliyevin müəllifliyi ilə işıq üzü görən iri həcmli (1068 səh.) “İngiliscə-Azərbaycanca əhatəli lüğət” (elmi rəyçi: prof. N.Məmmədli, elmi redaktor: Q.Əzizxanlı) kitabı ilk növbədə tərcümə fakültəsində oxuyan tələbələrə, tərcüməçilərə, eyni zamanda, tərcüməçiliyi özünə ikinci peşə seçmiş mütəxəssislərə ünvanlanmışdır. Bu sahə ilə maraqlananların istifadəsinə verilən lüğət təqribən 150 000 söz və söz birləşməsindən ibarətdir. Tərtibçi müəllif lüğətin tərtib prinsipləri bərədə kitaba ön söz yazmışdır. Kitabda qeyd edilir ki, ingiliscə-azərbaycanca, azərbaycanca-ingiliscə çeşidli lüğətlər olsa da, xüsusi mövzuları, sahə terminlərini özündə əks etdirən lüğətlərin çatışmazlığı özünü göstərir. Sözügedən lüğət bu çatışmazlığı aradan qaldırmağa yardımçı olacaq. Belə ki, hazırkı nəşr kənd təsərrüfatı, incəsənət, təhsil, mədəniyyət, aviasiya, xalçaçılıq, kino, kulinariya, idiomlar, evfemizmlər, gömrük, diplomatik əlaqələr, seçkilər, elektroenergetika, fövqəladə hallar, ətraf mühit, atçılıq, maliyyə, balıqlar, quşlar, güllər, futbol, həndəsə, zərgərlik, səhiyyə, kəşfiyyat, hərbi, QHT, işgəncə, din, baytarlıq, neft-qaz və s. daxil olmaqla 60-dan artıq mövzunu əhatə edir.

Məmməd Arazın “Qarabağ simfoniyası” kitabını isə “Elm və təhsil” (Bakı, 2016. 516 səh.) nəşriyyatı oxuculara təqdim etmişdir. Kitabda Azərbaycanın tanınmış şairinin vətəndaş mövqeyini əks etdirən publisistikası, qələm yoldaşları haqqında məqalələri, həmçinin, indiyədək çap edilməmiş müsahibə və ssenariləri toplanmışdır.

“Bu kitab tanıdığımız, sevdiyimiz şair Məmməd Arazı bizə həm də başqa yöndən – təkcə bu yurdun, vətənin deyil, həm də dünyamızın əsl məcnunu olan bir dünya vətəndaşını tanıdır... Təkcə bir quş başı üzənin daş-qalaq olunmasını tələb edən bəşərin gözü qabağında, dilimizə yenidən “qaçqın”, “didərgin” kəlmələrinin qayıtması, özü də əsrin, zamanın, sivilizasiyanın belə bir inkişafı mərhələsində qayıtması ücün haray çəkmir, həm də “yatmışları, batmışları” oyatmağa çalışaraq, “Bəşəri sivilizasiyanın ilk cığırı təbiətdən başlayır,” –deyərək, haray çəkən vətəndaş Məmməd Araz elə şair Məmməd Araz qədər yaşayacaq, –deyə kitaba yazılmış ön sözdə qeyd edilir.

Kitabın tərtibçisi Gülxanım Fətəliqızı, redaktorları Qardaşxan Əzizxanlı və Nurlan Umuddur.