2016-cı il oktyabrın 25-i və 26-da Birləşmiş Ərəb Əmirliyinin Şarjah Amerika Universitetində sülh yaratmaq və konfliktə qarşı idarəçilik sisteminin qurulması məqsədilə “Biznes Sülh Forumu-2016” adlı tədbir təşkil olunmuşdu. Tədbirə bu sahədə araşdırma aparan ali təhsil ocaqlarının nümayəndələri, akademiklər, beynəlxalq təşkilatların nümayəndələri və QHT-lər rəsmi dəvət olunmuşdular. Tədbirin missiyası sülh üçün çoxlu innovativ əməkdaşlıq imkanları əldə etmək, biznes sülh cəmiyyətini genişləndirmək və gücləndirməkdən ibarət idi. Həmçinin, konfransda sosial-iqtisadi yenidənqurma, siyasi çərçivə, razılaşma və ədalət, münaqişə üçün həssas davranış və s. adlı panellər təşkil olunaraq, geniş müzakirələr aparılmışdır.
Xəzər Universitetinin əməkdaşı Xəyalə Məmmədova Azərbaycanı tədbirdə uğurla təmsil etmişdir. Bundan başqa, o, Şarjah Amerika Universitetinin rəhbəri Dr.Bjorn Kjervelə və Dubay Universitetinin rəsmisi Dr. Yaprak Anadol ilə elmi inkişaf, elmi nəşrlar haqqında, elm və biznes üçün önəmli olan elmi bazalar haqqında əməkdaşlıqla bağlı geniş müzakirələr aparmışdır.