2016-cı il oktyabrın 18-də Azərbaycan Respublikasının Dövlət Müstəqilliyi Günü münasibətilə “Dünya” məktəbində “Yenidən doğan günəş” adlı silsilə tədbirlər həyata keçirildi.
Tədbirlər öncə şagird və müəllimlərin Ümümmilli Lider Heydər Əliyev muzeyi və Azərbaycan “İstiqlal” muzeyinə ekskursiyaları ilə başlandı. Eyni zamanda, məktəb kitabxanasında xüsusi sərgi və şagirdlərin əl işlərindən, rəsmlərindən ibarət incəsənət sərgisi nümayiş etdirildi. Radio qovşağından Azərbaycana həsr olunmuş şeirlər və musiqilər səsləndirildi.
Bu tədbirlər sırasında siniflər üzrə dövlət müstəqilliyinin 25 illiyinə həsr olunmuş movzularda sinif saatlarının keçirilməsi xüsusi əhəmiyyət daşıyırdı.
Həftə ərzində keçirilən silsilə tədbirlərin yekunu olaraq, məktəbin konsert salonunda şagirdlərin və müəllimlərin iştirakı ilə təntənəli tədbir təşkil edildi. Tədbirdə tarixçi müəllimlər Azərbaycanın yaxın keçmişindən bəhs etdilər və Müstəqillik Gününün tarixindən söhbət açaraq iştirakçıları məlumatlandırdılar.
Məktəbin Azərbaycan, rus, ingilis bölmələrinin şagirdləri hər üç dildə xalq şairi Səməd Vurğunun “Azərbaycan” şeirini və digər poeziya nümunələrindən parçalar səsləndirdilər.
Müstəqillik haqqında video-film nümayiş etdirildikdən sonra isə tədbir şagirdlərin milli rəqsi ilə rövnəqləndi.