2016-cı il oktyabrın 10-da İndoneziyanın Azərbaycandakı səfiri Dr. H. Husnan Bey Fananie Xəzər Universitetində bir sıra görüşlər keçirdi. İndoneziya səfirliyi nümayəndəliyinin tərkibinə birinci katib Anggraeni Widiastuti və böyük inzibati köməkçi Pərvanə Kərimova daxil idi. Görüş “Neftçilər” kampusunda baş tutdu.
Xəzər Universitetini isə universitetin rektoru Dr. Hassan Niknafs, İqtisadiyyat və menecment fakültəsinin dekanı Dr. İnqilab Əhmədov, Humanitar və sosial elmlər fakültəsinin dekanı dosent Cabir Xəlilov və Beynəlxalq əlaqələr şöbəsinin direktoru Turan Cəfərova təmsil edirdilər.
Səfir İndoneziyanın mədəniyyəti, iqtisadiyyatı və təhsil sistemi haqqında danışdı. O, görüş iştirakçılarına İndoneziya hökumətinin azərbaycanlı tələbələr üçün təklif etidyi təqaüd imkanları haqqında məlumat verdi. Dr. Fananie Xəzər Universitetinə indoneziyalı tələbələrə verdiyi təqaüdlərə görə təşəkkür etdi. Hazırda Xəzər Universitetində universitetin Beynəlxalq Tələbə Təqaüd Proqramı çərçivəsində iki indoneziyalı tələbə təhsil alır.
Xəzər Universitetinin rektoru Dr. Hassan Niknafs universitetin tarixi, təklif etdiyi ixtisaslar, universitetin resursları, laboratoriyaları, tədqiqat imkanları və başqa aspektlərdən danışdı. O, həm də universitetin yeni açılmış yataqxanası haqqında görüş iştirakçılarına məlumat verdi. Turan Cəfərova qeyd etdi ki, universitet İndoneziya ilə əlaqələri möhkəmləndirməkdə və oradan yeni tələbələr cəlb etməkdə maraqlıdır.
İndoneizya səfiri universitetin rektoruna xatirə hədiyyəsi verdi. Səfrilikdən gələn qonaqlara Xəzər Universitetinin məlumat materialları paylanıldı.