2016-cı il oktyabrın 4-də 5 oktyabr Beynəlxalq Müəllimlər Günü münasibətilə “Dünya” məktəbinin konfrans salonunda Binəqədi Rayon İcra Hakimiyyəti, Azərbaycan Təhsil İşçiləri Azad Həmkarlar İttifaqının Respublika Komitəsi və “Dünya” məktəbinin birlikdə hazırladığı bayram tədbiri keçirildi. Tədbirdə Xəzər Universitetinin təsisçisi, Direktorlar və Qəyyumlar Şurasının sədri professor Hamlet İsaxanlı, Binəqədi Rayon İcra Hakimiyyəti başçısının müavini Aygün Əliyeva, Azərbaycan Təhsil İşçiləri Azad Həmkarlar İttifaqının Respublika Komitəsinin sədr müavini Mirzə Cəfərzadə, Bakı Baş Təhsil İdarəsinin rəisinin müavini Hüseyn Əsgərov, Binəqədi rayon “Ziyalılar” cəmiyyətinin sədri Asəf Zamanov, Azərbaycanın teatr və kino aktyoru, xalq artisti, Azərbaycan Teatr Xadimləri İttifaqının yaradıcılıq üzrə sədr müavini Hacı İsmayılov, “Dünya” məktəbinin kollektivi, Binəqədi Rayonunda fəaliyyət göstərən məktəb və bağçaların müəllim-rəhbər heyəti, Yeni Azərbaycan Partiyasının fəal gəncləri iştirak edirdilər.

Tədbirdə təbriklə çıxış edən professor Hamlet İsaxanlı bu gün Azərbaycanda böyük müəllim ordusunun yarandığını qeyd etdi. Natiq bildirdi ki, demək olar ki, hər ailədə müəllim var və hər ailə müəllim-şagirdlərlə bağlıdır. Müəllimin cəmiyyət həyatında mühüm rolundan bəhs edən professor İsaxanlı müəllimliyin dünyada ən şərəfli vəzifə olduğunu, bu gün dünyanın hər yerində müəllimlərə xüsusi qayğı göstərildiyini, ölkəmizdə də müəllimlərin rifahının daha da yaxşılaşdırılması üçün xüsusi tədbirlər planı hazırlandığını qeyd etdi.

Daha sonra Azərbaycan Təhsil İşçiləri Azad Həmkarlar İttifaqının Respublika Komitəsinin sədr müavini Mirzə Cəfərzadə çıxış edərək, qeyd etdi ki, bu gün respublikada təhsil işçilərinin normal şəraitdə işləməsi, onların sosial müdafiəsinin gücləndirilməsi üçün tədbirlər görülür. O, həmçinin bildirdi ki, harada, hansı vəzifədə işləməsindən asılı olmayaraq, hamı müəllimlərə qayğı və diqqət göstərməlidir.

Tədbirdə müəllimləri təbrik edən Bakı Baş Təhsil İdarəsinin rəisinin müavini Hüseyn Əsgərov bildirdi ki, hər şeyin elmə-təhsilə söykəndiyi indiki dünyada Azərbaycan dövlətinin gücü, qüdrəti müəllimlərin gücündə və qüdrətindədir. O, eyni zamanda, bu gün Azərbaycanda gözəl və güclü müəllim ordusunun formalaşdığını da vurğuladı.

Xalq artisti Hacı İsmayılovun çıxışı iştirakçılar üçün unudulmaz oldu. Aktyor oynadığı müəllim rolları haqqında danışdı, orta məktəb illərini xatırladı, bütün cəmiyyətimizə, xalqımıza birlik arzuladı. Çıxışının sonunda müəllimləri təbrik edən natiq onların qarşısında baş əydi.

Binəqədi Rayon İcra Hakimiyyətinin başçısı adından müəllimləri təbrik edən Rayon İcra Hakimiyyəti başçısının müavini Aygün Əliyeva son illər bir sıra sahələrdə olduğu kimi, ölkədə təhsil sahəsində də yaddaqalan uğurlar əldə edildiyini bildirdi. Aygün Əliyeva vurğuladı ki, Azərbaycanda yeni gənc nəslin yetişməsi və tərbiyə olunmasında təhsilin, məktəbin əhəmiyyəti, rolu çox böyükdür və bütün bu uğurlar Prezident İlham Əliyevin təhsil sahəsində apardığı siyasətin məqsədyönlülüyünün bariz sübutudur.

Müəllimlər Günü münasibətilə keçirilən tədbiri Xəzər Universitetinin Kamera orkestri özünün klassik musiqi ifaları ilə bəzədi.