2016-cı il sentyabrın 26-dan 29-na kimi Xəzər Universitetinin Neft-qaz mühəndisliyi departamentinin müdiri, “eiLink” Tədqiqat və İnkişaf Mərkəzinin direktoru Qəşəm Zeynalov və departamentin müəllimləri Şəhriyar Alxaslı, İzat Şahsenov və Elşən Rzayev Neft Mühəndisləri Cəmiyyətinin Azərbaycan bölməsinin nümayəndə heyətinin üzvləri kimi Birləşmiş Ərəb Əmirliyinin Dubay şəhərində keçirlən Beynəlxalq Neft Mühəndisləri Cəmiyyətinin İllik Texniki Konfransında və Sərgisində (SPE Annual Technical Conference and Exhibition) iştirak etmişlər. Tədbirdə aparıcı neft və qaz şirkətlərinin və eləcə də, bu istiqamətdə aparıcı rol oynayan universitetlərin neft-qaz yataqlarının işlənməsi və istismarı üzrə əldə etdiyi yeni texnologiyalara həsr edilmiş texniki məruzələrin və sərgilərin təqdimatı keçirilmişdir. Konfrans və sərgi çərçivəsində Qəşəm Zeynalov Nyu Meksiko Texniki İnstitutunun, Aberdin Universitetinin, Kral Abdulla Elm və Texnologiya Universitetinin və bir sıra şirkətlərin nümayəndələri ilə görüşlər keçirmiş və mümkün əməkdaşlıq sahələrini müzakirə etmişdir.