Azərbaycan Respublikası Mədəniyyət və Turizm Nazirliyi və Heydər Əliyev Fondunun təşkilatçılığı ilə sentyabrın 18-27 - də keçirilən VIII Üzeyir Hacıbəyli Beynəlxalq Musiqi Festivalı çərçivəsində sentyabrın 23-də Üzeyir Hacıbəylinin ev muzeyində növbəti tədbir keçirildi.

Tədbiri muzeyin direktoru, Əməkdar incəsənət xadimi, bəstəkar Sərdar Fərəcov açaraq,  dahi bəstəkarın həyat və fəaliyyəti haqqında geniş məlumat verdi. Xəzər universitetinin təsisçisi, Direktorlar və Qəyyumlar Şurasının sədri professor Hamlet İsaxanlı görkəmli musiqiçinin çoxşaxəli yaradıcılığından, əsərləri əsasında çəkilmiş filmlərdən danışdı, onların 80-dən çox ölkədə nümayiş olunduğunu bildirdi.

Çıxışlardan sonra Xəzər Universitetinin Musiqi və incəsənət departamentinin müdiri, pianoçu Zülfiyyə Sadıqova və Bratislava Musiqi Akademiyasının doktorantı, skripkaçı Fərhad Aşumov Azərbaycan və dünya bəstəkarlarının əsərlərindən fraqmentlər ifa etdilər.

Sentyabrın 26-da festival çərçivəsində Kanera və orqan musiqisi zalında keçirilmiş konsertdə də Zülfiyyə Sadıqova və Fərhad Aşumov  iştirak etmişlər.