Sentyabrın 15-də Xəzər Universitetində yeni dərs ilinin başlanmasına həsr olounmuş mərasim keçirildi. Mərasimdə universitetə yeni qəbul olunmuş tələbələr, onların valideynləri, universitetin rəhbərliyi və professor-müəllim heyəti iştirak edirdilər.

Mərasim Azərbaycanın Dövlət himninin ifası ilə başlandı. Universitetin rektoru Hassan Niknafs, təsisçisi, Direktorlar və Qəyyumlar Şurasının sədri professor Hamlet İsaxanlı çıxış edərək, universitetə qəbul olunmuş gəncləri təbrik etdilər, onlara universitet haqqında məlumat verdilər. Bildirdilər ki, universitetdə yüksək səviyyəli təhsil almaq üçün hər cür şərait yaradılmışdır, universitetin beynəlxalq əlaqələri və proqramları xarici ölkələrin – Avropa, ABŞ və Uzaq Şərq universitetlərində təhsil almaq imkanları yaradır, tələbələrin yalnız yüksək ixtisaslı mütəxəssislər kimi yetişməsinə yox, həm də geniş dünyagörüşlü və mədəni səviyyəli insanlar kimi formalaşmasına ciddi diqqət yetirilir və bunun üçün müxtəlif sənət növləri – musiqi, rəsssamlıq, xalçaçılıq və zərgərlik  tədris olunur. Onlar tələbələrə yorulmadan çalışmağı tövsiyə etdilər, onlara uğurlar arzuladılar.

H. İsaxanlı, H. Niknafs, prorektorlar Məhəmməd Nuriyev və İsaxan İsaxanlı, İqtisadiyyat və menecment fakültəsinin dekanı İnqilab Əhmədov, Humanitar və sosial elmlər fakültəsinin dekanı Cabir Xəlilov və Təhsil fakültəsinin dekanı Elza Səmədova ən yüksək bal toplamış 15 nəfər tələbəyə tələbə biletini və hədiyyələr təqdim etdilər, onlarla xatirə şəkli çəkildi.

Universitetə yeni qəbul olunmuş tələbələr adından Murad Nuriyev (maliyyə ixtisası) çıxış etdi, Xəzər Universitetinin geniş imkanlarından bəhrələnərək yüksək ixtisaslı mütəxəssislər kimi yetişmək üçün ciddi səy göstərəcəklərini bildirdi.

Universitetin Musiqi və incəsənət departamentinin hazırladığı konsertdə tələbə qızlar və oğlanlardan ibarət rəqs qrupları məharətlərini nümayiş etdirdilər, Müslüm Maqomayev adına Azərbaycan Dövlət Filarmoniyasının solisti, universitetin müəllimi Məhsəti Cabbarlının ifasında mahnılar səslənd.

Mərasim yeni tələbələrin auditoriyalara dəvət olunması ilə başa çatdı. Auditoriyalarda onlar fakültə dekanları və departament müdirləri ilə görüşdülər. Onlara təhsil alacaqları ixtisaslar haqqında ətraflı məluma verildi, sualları cavablandırıldı.

Xəzər Universitetində yeni dərs ili başlandı.