2016-cı il sentyabrın 13-də Təbriz Universiteti ilə Xəzər Universiteti arasında memorandum imzalandı. Təbriz Universitetindən olan nümayəndə heyəti ilə görüş Xəzər Universitetinin “Neftçilər” kampusunda baş tutdu. Təbriz Universitetinin nümayəndə heyəti universitetin rektoru Məhəmməd-Reza Pour-Məhəmmədi, Təhsil, Mədəniyyət və Tədqiqat üzrə Akademik Mərkəzin Şərqi Azərbaycan bölməsinin rəhbəri Əhməd Farşbafian, İranının Aəzrbaycandakı səfirliyinin nümayəndələri və digər şəxslərdən ibarət idi. Xəzər Universiteti nümayəndə heyətinin tərkibinə universitetin təsisçisi, Direktorlar və Qəyyumlar Şurasının sədri professor Hamlet İsaxanlı, universitetin rektoru Hassan Niknafs, İnzibati və Tələbə İşləri üzrə prorektor İsaxan İsaxanlı, Beynəlxalq Əlaqələr Şöbəsinin direktoru Turan Cəfərova daxil idilər.
Görüşdə ik olaraq Təbriz Universitetin rektoru professor Məhəmməd-Reza Pour-Məhəmmədi çıxış etdi və 20.000 tələbəsi, mühəndislik, hüquq, kənd təsərrüfatı və digər sahələrdə çoxsaylı proqralar təklif edən İranın ikinci ən böyük universiteti –Təbriz Universiteti barəsində görüş iştirakçılarını məlumatlandırdı.
Daha sonra Xəzər Universitetin təsisçisi, Direktorlar və Qəyyumlar Şurasının sədri professor Hamlet İsaxanlı çıxış edərək, Xəzər Universtetinin inkişafı, universitetin beynəlmiləlləşdirmə siyasəti və Təbriz Universiteti ilə əməkdaşlıq maraqlarından danışdı.
Danışıqlar iki universitet arasında əməkdaşlığın prinsipləri, tələbə və işçi mübadiləsi, dərəcə proqramları, tədqiqat və nəşr işləri, bakalavr tələbələrinin elmi işlərinə nəzarət və digər müştərək layihələrin müzakirəsi ilə davam etdi. Sonda iki universitet arasında anlaşma memorandumu imzalandı.