Xəzər Universiteti və ölkə mediasında xəbər verildiyi kimi, QS təşkilatı tərəfindən 2016-cı il üçün müəyyənləşdirilmiş Avropa və Mərkəzi Asiyanın inkişaf etməkdə olan 21 ölkəsinin ən yaxşı universitetlərinin reytinq cədvəlində Xəzər Universiteti 68-ci yeri tutaraq Azərbaycanın ən yaxşı ali məktəbi seçilməklə yanaşı, bölgənin ilk 70 ali təhsil müəssisəsi arasında yer almış yeganə Azərbaycan universitetidir. Reytinqə qatılan digər Azərbaycan universitetlərindən – Bakı Dövlət Universiteti 88-ci, Qafqaz Universiteti 89-cu yerdə, Azərbaycan Dillər Universiteti 121-130-cu, Azərbaycan Dövlət İqtisadiyyat Universiteti və ADA Universiteti isə 150-200-cü yerlər arasında qərarlaşıb.

Azərbaycan Təhsil Nazirliyinin orqanı - “Azərbaycan müəllimi” qəzeti 25 iyun 2016-cı il tarixli nömrəsində bu hadisəyə bütün bir səhifə həsr etmişdir. Səhifənin müəllifi redaksiyanın Beynəlxalq əlaqələr şöbəsinin müdiri Oruc Mustafayevdir. Səhifədə onun məqaləsi ilə yanaşı, 100-dək olan reytinq siyahısı da verilmişdir.