2016-cı il iyulun 11-də cari ilin yaz semestrində Xəzər Universitetində qonaq olan estoniyalı qonaq mühazirəçi Marye Mets Erasmus Mundus proqramının EMBER layihəsi çərçivəsində mübadilə proqramını tamamladı.
Marye Mets Tallin Texnologiya Universitetinin tabeliyində olan Estoniya Dəniz Akademiyasında mühazirəçidir. O, idarəetmə psixologiyası, ümumi idarəetmə, ünsiyyət, etika və etiket (əxlaq nəzəriyyəsi və davranış normaları) kimi fənləri tədris edir. Marye Tallin Universitetindən Təşkilati Davranış ixtisası üzrə magistr dərəcəsi almışdır. Xəzər Universitetində mobilliyi müddətində Marye Mets İqtisadiyyat və menecment fakültəsinin bakalavr tələbələrinə insan resurslarının idarə olunması fənninindən mühazirələr oxumuşdur. O, həmçinin beynəlxalq tələbə və müəllimlərin adaptasiyası ilə bağlı tədqiqat da aparırdı.
EMBER layihəsi Qərbi/Mərkəzi/Şərqi Avropa və Cənubi Qafqazdan olan iyirmi tərəfdaş və dörd əlaqədar tərəfdaş ali təhsil müəssisələrindən ibarət konsorsiumdur. Layihənin hədəf sahələri iqtisadiyyat, biznes, dillər və sosiologiyadır. Xəzər Universitetində EMBER layihəsi Beynəlxalq Əlaqələr Şöbəsi tərəfindən idarə olunur.