İyunun 8-də Xəzər Universitetinin Mərmər zalında Musiqi və incəsənət departamentinin təşkilatçılığı ilə universitetin 25 illiyinə həsr olunmuş tələbələrin rəsm əsərlərindən ibarət sərgi təşkil edildi. Tədbirdə universitetin rəhbərliyi, əməkdaşlar və tələbələr, qonaqlar  iştirak edirdilər.

Tədbiri Universitetin müəllimi, rəssam Afaq Kərimova açaraq, sərgi haqqında iştirakçılara məlumat verdi. Sonra  sənətşünas, elmlər doktoru Kübra Əliyeva, əməkdar rəssam Asif Azərelli, AMEA Nizami adına Ədəbiyyat İnstitutunun əməkdaşı, elmlər doktoru Esmira Fuad, Əzim Əzimzadə adına Bakı Rəssamlıq Məktəbinin direktoru, elmlər doktoru Telman İbrahimov, əməkdar rəssam Rəis Rəsulzadə, rəssam Rafael Əlizadə çıxış edərək, tələbələrin rəsm əsərləri haqqında  fikirlərini bildirdilər, universiteti 25 illiyi münasibətilə təbrik etdilər.

Xəzər Universitetinin təsisçisi, Direktorlar və Qəyyumlar Şurasının sədri professor Hamlet İsaxanlı çıxışında qeyd etdi ki, universitetdə tələbələrə peşə ixtisası verilməklə yanaşı, onların mədəni səbiyəsinin yüksəldilməsi, estetik zövqlərinin formalaşdırılması sahəsində də ciddi iş aparılır.

Tədbir iştirakçıları universitetin Kamera orkestrinin kiçik konsertini dinlədikdən sonra tələbələr bir-bir öz işlərini təqdim etdilər və onlara “Xəzər Universitetinin 25 illiyi münasibətilə tələbələrin uğurlu rəsm əsərlərinə görə” sertifikatı təqdim olundu. Sertifikatları rəssamlar Rəis Rəsulzadə, Asif Azərelli və Rafael Əlizadə təqdim etdilər.