2016-cı il iyunun 2-də Sumqayıt şəhərində yerləşən “28 May” Mədəniyyət Evində Xəzər Universiteti “Dünya” məktəbinin Sumqayıt ictimaiyyəti ilə görüşü keçirildi. Görüş Sumqayıt şəhərində “Dünya” məktəbinin filialının yaradılmasına həsr edilmişdi. Xəzər Universitetinin təsisçisi, Direktorlar və Qəyyumlar Şurasının sədri professor Hamlet İsaxanlı zala toplaşan sumqayıtlıları salamlayaraq, onlarla görüşündən, Sumqayıtda aparılan yenidənqurma işlərindən məmnun qaldığını bildirdi. O, Sumqayıt şəhərində “Dünya” məktəbinin yaradılmasını Sumqayıt üçün müsbət hal kimi dəyərləndirdi.

Rəsmi hissədən sonra Zülfiyə Sadıqovanın rəhbərlik etdiyi Kamera orkestri, Xəzər Universiteti və “Dünya” məktəbinin oğlanlardan və qızlardan ibarət rəqs qruplarının rəngarəng rəqsləri salona toplaşanların böyük marağına səbəb oldu. Xəzər Universitetinin musiqi müəlliməsi Məhsəti Cabbarova və universitetin doktorantı Marta Lorinin sazda, İqtisadiyyat və menecment fakültəsinin tələbəsi Musa Abdullayevin solo ifaları, “Dünya” məktəbinin müəllimləri və  şagirdləri tərəfindən ustalıqla  hazırlanmış tamaşalardan fraqmentlər tamaşaçılar tərəfindən dəfələrcə alqışlandı.

Sonda xatirə şəkilləri çəkildi.