Xəzər Universitetinin “Imagine” komandası P2P: Ekstremizmə qarşı Mübarizə Proqramında iştirakları çərçivəsində hazırladıqları və həyata keçirdikləri marketinq kampaniyası ilə top 6 finalçıdan biri seçildi. Gənclər üçün olan bu qlobal təşəbbüsün və beynəlxalq müsabiqənin 2016-cı ilin yaz dövründə dünyanın 30 ölkəsindən 100 universitet iştirak edirdi. Bu il Azərbaycandan bu müsabiqəyə 2 universitet qoşuldu.

Seçilən top 6 finalçı 2016-cı ilin iyununda öz kampaniyalarını ABŞ-da (Washington, D.C.) təqdim edəcəklər. Altı komanda ABŞ Dövlət Departamenti və Facebook  şirkətini təmsil edən iki münsiflər heyəti tərəfindən seçildi. Hər iki münsiflər heyəti təqaüd üçün bir-birləri ilə yarışan üç komanda seçdi.

Xəzər Universitetinin “Imagine” komandası ABŞ Dövlət Departamenti tərəfindən seçilmişdir və kampaniyalarını 2016-cı il iyunun 27-də Belçika və ABŞ-dan olan iki unversitet komandasına qarşı baş dövlət rəsmilərinə təqdim edəcəklər.

Bir-birlərinə qarşı yarışan digər üç komanda isə Əfqanıstan, Belçika və Niderlanddan olan universitetləri təmsil edir. Bu komandalar isə kampaniyalarını Facebook rəhbərliyinə təqdim edəcəklər.

“Imagine” komandasının üzvləri İqtisadiyyat və menecment fakültəsinin 9 tələbəsidir və marketinq fənninin müəllimi Sana İmran komandaya rəhbərlik edir. Komanda üzvlərinə daxildirlər: Əlihüseyn Ağayev (menecment), Dinarə Katibli (mühasibat və audit), Erlan İsmayılov (maliyyə), Kamilla Lətifova (marketinq), Nadir Qədirli (maliyyə), Nərmin Abbasova (mühasibat və audit), Nərmin Zari (biznesin idarə edilməsi), Süleyman Yagizarov (maliyyə) və Ülviyyə Əzizova (maliyyə).

P2P: Ekstremizmə qarşı Mübarizə Proqramı ABŞ Dövlət Departamenti tərəfindən dəstəklənən və marketinq şirkəti olan EdVenture Partners (EVP) tərəfindən həyata keçirilən universitet gəncləri üçün olan qlobal təşəbbüs və beynəlxalq müsabiqədir. Bu proqram sahibkarlıq və dövlət agentlikləri üçün universitet tələbələri və müəllimləri ilə ünsiyyət qurmaq və real nəticələri olan, tələbələrə əsl praktiki bilik verən proqram vasitəsilə gerçək problemlərin həllinə onları cəlb etmək  üçün innovativ və effektiv yol təmin edir. Proqram haqqında ətraflı məlumat aşağıdakı linklərdən əldə oluna bilər:

ABŞ Dövlət Departamentinin vebsaytı: http://eca.state.gov/video/p2p-challenging-extremism

EdVenture Partners şirkətinin vebsaytı: http://edventurepartners.com/peer2peer/

Biz komandamızla fəxr edirik və ABŞ-da edəcəkləri təqdimatda onlara çoxlu uğurlar arzu edirik. İrəli, “Imagine” komandası!