2016-cı il aprelin 22-də Xəzər Universiteti Polşa, İran və İraq universitetləri və təhsil şirkətlərinin nümayəndələri ilə universitetin “Neftçilər” kampusunda görüş keçirdi. Tədbir “Akademi Group” Xaricdə Təhsil şirkətinin təşkilatçılığı və Beynəlxalq Əlaqələr Şöbəsi və İctimaiyyətlə əlaqə və media şöbəsinin dəstəyi ilə həyata keçirildi.
Universitetin rektoru Dr. Hassan Niknafs, akademik işlər üzrə prorektor professor Məhəmməd Nuriyev və Beynəlxalq əlaqələr şöbəsinin direktor assistenti Günay Fərzəliyeva iştirakçılar arasında idi. Qonaqlar Varşava İqtisadiyyat Məktəbi, “Rony” Təhsil Xidmətləri Şirkəti, Universal Təhsil, “Light (Ziya)” Təhsil Qrupu və “Oskar” Təhsil və Məsləhət şirkətlərinin nümayəndələri idilər.
Xəzər Universitetinin rektoru Dr. Hassan Niknafs qonaqları salamladı və universitet haqqında qısa məlumat verdi. Daha sonra Beynəlxalq əlaqələr şöbəsinin direktor assistenti Günay Fərzəliyeva Xəzər Universiteti, fakültələr və proqramlar, Azərbaycan daxilində və xaricində olan universitetlər arasında reytinqi və dünyanın bir çox universitetləri ilə olan beynəlxalq əməkdaşlıqlar və əlaqələr haqqında təqdimat etdi. İştirakçı universitet və şirkətlərin nümayəndələri də qısa təqdimat keçirdilər.
Tədbir mümkün əməkdaşlıqların müzakirəsi ilə sona çatdı.