2024-cü il sentyabrın 28-də Pekin Xarici Dillər Universitetinin ev sahibliyi və təşkilatçılığı ilə Birinci Çin Azərbaycanşünaslıq Beynəlxalq Elmi Konfransı keçirilmişdir. Konfransın məqsədi Çində azərbaycanşünaslıq elminin inkişafına təkan vermək, iki ölkə alimləri arasında təmasları dərinləşdirmək, Çinin gənc alimləri üçün müzakirə platforması yaratmaq olmuşdur.

Prof.Akad. Hamlet İsaxanlı konfransın əsas məruzələr bölümündə çıxış etmişdir. Prof. Akad. Hamlet İsaxanlı “Azərbaycan və regionda Çinin obrazı. Azərbaycan-Çin tarixi əlaqələri” adlı məruzəsini geniş auditoriyanın nəzərinə çatdırmışdır. Natiq öz məruzəsində Azərbaycanın mədəniyyətində, ədəbiyyatında Çin mədəniyyətinin elementlərini və obrazlarını tarixi-müqayisəli metodla analiz edərək, iki ölkə xalqlarının tarixi bağlılığını sübut edən elmi faktları ortaya qoymuşdur.

Prof.Akad. Hamlet İsaxanlı, eyni zamanda, konfransın açılış mərasimində çıxış edərək, belə tədbirlərin əhəmiyyətini xüsusi vurğulamış, Xəzər Universiteti və Pekin Xarici Dillər Univeriteti arasında əməli əməkdaşlıq barədə dinləyicilərə məlumat vermişdir.

Qeyd edək ki, “İpək Yolu ruhu ilə Çin-Azərbaycan münasibətlərini möhkəmləndir!” devizi altında təşkil olunan beynəlxalq elmi konfransda Azərbaycan və Çinin siyasi, iqtisadi və humanitar sahələrini təmsil edən 50-yə yaxın ekspert və alimin ölkəmizin ədəbiyyatı, mədəniyyəti, iqtisadiyyatı, siyasəti haqqında məruzələri dinlənilib.. Konfransın təşəbbüskarı və təşkilatçısı - Pekin Xarici Dillər Universiteti Asiya fakültəsi Azərbaycan dili kafedrasının müdiri filologiya üzrə fəlsəfə doktoru Aqşin Əliyev, eyni zamanda, Xəzər Universiteti Çin Tədqiqatlar Mərkəzinin direktoru kimi də fəaliyyət göstərir.