Xəzər Universitetinin rektoru Dr. Raziyə Isayeva Böyük Britaniyanın Azərbaycandakı Səfirliyi tərəfindən Kral III Çarlzın doğum günü münasibətilə 2026- cı il iyunun 18- də təşkil olunan tədbirdə iştirak edib.

Hyatt Regency Hotel-də keçirilən tədbirə Böyük Britaniyanın Azərbaycandakı Səfirliyi ev sahibliyi edib. Tədbirdə dövlət və hökumət nümayəndələri, diplomatik korpusun üzvləri, ictimaiyyət və müxtəlif sahələri təmsil edən qonaqlar iştirak ediblər.

Çıxışı zamanı səfir Duncan Norman Azərbaycan və Böyük Britaniya arasında uzun illər ərzində formalaşmış əlaqələrə toxunaraq, ölkənin son onilliklər ərzində keçdiyi inkişaf yolunu yüksək qiymətləndirib. O qeyd edib ki, Azərbaycan bu gün dinamik, müasir və qlobal dünya ilə sıx əlaqələrə malik ölkədir.

Tədbir Böyük Britaniya və Azərbaycan arasında dostluq və əməkdaşlıq əlaqələrinin qeyd edilməsi, eləcə də diplomatik və ictimai əlaqələrin inkişafı baxımından əhəmiyyətli platforma olub.