Xəzər Universitetinin koordinatoru olduğu, Avropa İttifaqının Erasmus+ proqramının “Azərbaycanda İnstitusional Repozitoriyalar Şəbəkəsi vasitəsilə Tədqiqat Potensialının İnkişafı” (DIRNA) layihəsi çərçivəsində 2026- cı il 8- 9 iyunda Naxçıvan Dövlət Universitetində seminar və təlim proqramı təşkil olunub.

Tədbirin açılış mərasimində çıxış edən Naxçıvan Dövlət Universitetinin rektoru Dr. Elbrus İsayev layihənin ölkədə açıq elm prinsiplərinin təşviqi, elmi tədqiqat fəaliyyətinin gücləndirilməsi və universitetlərarası əməkdaşlığın inkişafı baxımından mühüm əhəmiyyət daşıdığını vurğulayıb. O qeyd edib ki, DIRNA layihəsi ali təhsil müəssisələri arasında elmi əlaqələrin genişlənməsinə və beynəlxalq təcrübənin paylaşılmasına mühüm töhfə verir.

Sonra çıxış edən Xəzər Universitetinin rektoru və layihənin koordinatoru Dr. Raziyə İsayeva layihənin icrası müddətində əldə olunan nəticələrdən bəhs edib. Rektor bildirib ki, DIRNA layihəsi Azərbaycan universitetlərində açıq elm mədəniyyətinin formalaşdırılmasına, institusional repozitoriyaların inkişafına və beynəlxalq əməkdaşlıq əlaqələrinin möhkəmlənməsinə əhəmiyyətli töhfə verib. O, layihədə iştirak edən 8 Azərbaycan və 3 Avropa universiteti arasında qurulan tərəfdaşlığın gələcək əməkdaşlıqlar üçün yeni imkanlar yaratdığını diqqətə çatdırıb.

Hibrid formatda keçirilən seminarın ilk günündə İtaliya tərəfdaşlarının nümayəndələri Francesco Tarquini və Grazia Di Bartolomeo təqdimatlarla çıxış ediblər. Təqdimatlar çərçivəsində açıq elm üzrə tədris modulları, rəqəmsal kitabxanalarda elektron kolleksiyaların formalaşdırılması və idarə olunması istiqamətində beynəlxalq təcrübələr iştirakçılarla bölüşülüb.

Seminarın növbəti sessiyasında Finlandiya tərəfdaşlarının təcrübəsi əsasında açıq giriş siyasətləri və institusional repozitoriyaların gündəlik idarə olunmasında açıq giriş təcrübələri müzakirə edilib. Sessiya zamanı açıq elm prinsiplərinin tətbiqi, metadata idarəçiliyi, elmi nəticələrin görünürlüyünün artırılması, eləcə də süni intellekt və innovativ texnologiyaların elmi fəaliyyətə təsiri ətrafında fikir mübadiləsi aparılıb.

Tədbir çərçivəsində Xəzər Universiteti və Naxçıvan Dövlət Universitetinin rektorlarının iştirakı ilə panel müzakirəsi də təşkil olunub. Panel zamanı ali təhsilin inkişaf istiqamətləri, beynəlxalq tərəfdaşlıqların genişləndirilməsi, açıq elm siyasətinin tətbiqi və gələcək əməkdaşlıq perspektivləri müzakirə edilib.

Təlim proqramının ikinci günü Türkiyənin İzmir Yüksək Texnologiya İnstitutunun nümayəndələrinin təqdimatları ilə davam edib. İYTE Kitabxana və Sənədləşdirmə İdarəsinin müdiri Gültekin Gürdal “Akademik nəşriyyatda transformasiya: açıq giriş və süni intellekt” mövzusunda çıxış edərək, müasir elmi nəşriyyat sahəsində baş verən yeniliklərdən danışıb. Onun təqdim etdiyi “Metadata keyfiyyəti və beynəlxalq standartlar” mövzusunda sessiyada məlumat keyfiyyətinin yüksəldilməsi, metadata standartlarının tətbiqi və beynəlxalq təcrübələr ətrafında müzakirələr aparılıb.

Günün yekununda Gültekin Gürdal, Begüm Yavuz və Gönül Kafalı Canın iştirakı ilə “Tədqiqatların gücləndirilməsi: açıq girişdən məlumatların idarə edilməsinədək” mövzusunda interaktiv sessiya keçirilib. Sessiya zamanı açıq giriş siyasətləri, tədqiqat məlumatlarının idarə olunması, metadata standartlarının tətbiqi və rəqəmsal həllərin elmi fəaliyyətin səmərəliliyinin artırılmasındakı rolu geniş şəkildə müzakirə olunub.

Seminar və təlim proqramı iştirakçılar arasında təcrübə mübadiləsinin aparılması, açıq elm prinsiplərinin təşviqi və layihə çərçivəsində əldə olunan nəticələrin paylaşılması baxımından mühüm platforma rolunu oynayıb.