Xəzər Universiteti “Dünya” məktəbinin “İnciçiçəyi” zalında 2026- cı il iyunun 24- də  “Nailəxanım: musiqi dolu həyat” adlı musiqili axşam keçirildi.

Musiqili axşam Nailəxanım İsayevanın müxtəlif illərdə yazdığı musiqi əsərlərini əhatə edirdi. N. İsayevanın bəstələdiyi və “Dünya” məktəbinin himni olan "Dünyam" mahnısını “Dünya” məktəbinin şagirdlərindən ibarət xor qrupu ifa etdi. "Tez gəlin" və "Gözəldir" əsərlərini Əməkdar artist İlahə Əfəndiyeva, "İnciçiçəyi" mahnısını Xalq artisti Gülyanaq Məmmədova “Hicaz” qrupu ilə birlikdə, "Külək və qız" və "Tək qalmaq istəyirəm" mahnılarını Əməkdar artist Şölə Səfərəliyeva, "Səni sevdim çox sadəcə" əsərini solist Asim Muradov, "Lalə" mahnısını isə Əməkdar artist Bəyimxanım Vəliyeva təqdim etdilər. Tədbirdə paralel olaraq, Nailəxanım İsayeva haqqında arxiv film-süjetlər  nümayiş olundu.

Proqrama Xalq artisti Sərdar Fərəcovun Nailəxanım İsayevanın xatirəsinə həsr etdiyi “Elegiya”, eləcə də bəstəkar Cavanşir Quliyevin "Nailə" adlı əsərləri də daxil edilmişdi. Hər iki parçanı universitetin kamera orkestri ifa etdi.

Musiqili axşamın sonunda Xəzər Universitetinin təsisçisi, Direktorlar və Qəyyumlar Şurasının sədri Prof.Akad. Hamlet İsaxanlı çıxış edərək, Nailəxanımın işıqlı xatirəsinə həsr olunmuş musiqili axşamın əsas məqsədindən danışdı və bildirdi ki, Xəzər Universitetində Nailəxanımın təşəbbüsü ilə yaradılmış Kamera Orkestri bundan sonra  Nailəxanım İsayevanın adını daşıyacaq.

Qeyd edək ki, tədbirdə səslənən mahnıların mətnlərinin müəllifi Prof.Akad. Hamlet İsaxanlıdır. H. İsaxanlı həyatı boyu ömür- gün yoldaşının sənətinə dərin sevgi və hörmət bəsləyib, onun  şeirlərinin seçmə nümunələrinə Nailəxanım İsayevanın bəstəkarlığı sayəsində mahnı ömrü nəsib olub. Bu mahnılar Azərbaycanın tanınmış ifaçılarının repertuarına daxil olaraq, tamaşaçı məhəbbəti qazanıb.

Tədbirdə musiqi, elm və sənət aləminin tanınmış simaları iştirak edirdilər.