2026- cı il iyunun 11- də tədbirin açılış mərasimi Xəzər Universitetinin Kamera Orkestrinin çıxışı ilə başlayıb. Açılış mərasimində çıxış edən Xəzər Universitetinin rektoru, eyni zamanda DIRNA layihəsinin koordinatoru Dr. Raziyə  İsayeva  layihənin universitetlərin elmi-tədqiqat potensialının gücləndirilməsində mühüm rol oynadığını vurğulayıb. O bildirib ki, layihənin əsas məqsədi Azərbaycanın ali təhsil müəssisələrində yaradılan elmi məhsulların – məqalələrin, kitabların, tədqiqat işlərinin və digər akademik nəşrlərin vahid elektron arxiv şəbəkəsində toplanması, qorunması və beynəlxalq elmi ictimaiyyət üçün əlçatanlığının təmin edilməsidir. Rektor qeyd edib ki, layihə ölkədə elektron arxiv sisteminin inkişafına, elmi-tədqiqat fəaliyyətinin görünürlüyünün artırılmasına və Azərbaycan universitetlərinin beynəlxalq elmi məkana inteqrasiyasına əhəmiyyətli töhfə verir.

Çıxış edən layihə tərəfdaşı İzmir Yüksək Texnologiya İnstitutunun rektoru, professor dr. Yusuf Baran isə beynəlxalq əməkdaşlığın elm və innovasiya sahəsində əhəmiyyətindən bəhs edib.

Açılış mərasimindən sonra layihənin üçillik fəaliyyətini və əldə olunan nəticələri əks etdirən videoçarx nümayiş olunub. Görüş çərçivəsində professor Yusuf Baran “Elm liderliyi” mövzusunda təqdimatla çıxış edərək, müasir ali təhsil müəssisələrində elm liderliyinin  rolu və tədqiqat ekosisteminin inkişaf istiqamətləri barədə fikirlərini iştirakçılarla bölüşüb.

Tədbirin moderatoru Arzu Qayıtmazova tərəfindən tərəfdaş universitetlərin üçillik fəaliyyət hesabatlarının təqdimatı üçün növbəti sessiya açıq elan olunub. Sessiya çərçivəsində layihənin Avropa tərəfdaşları olan İzmir Yüksək Texnologiya İnstitutu (Türkiyə), Jyvaskyla Universiteti (Finlandiya) və L’Aquila Universitetinin (İtaliya) nümayəndələri tərəfindən layihə müddətində görülmüş işlər, əldə edilmiş nəticələr, formalaşdırılmış əməkdaşlıq imkanları və gələcək fəaliyyət istiqamətləri barədə ətraflı hesabatlar təqdim edilib.

Yekun görüşün ikinci günü, iyunun 12- də layihənin yerli tərəfdaş universitetlərinin nümayəndələri tərəfindən DIRNA layihəsi çərçivəsində görülmüş işlər, yaradılmış imkanlar və əldə olunmuş nailiyyətlər təqdim olunub. Sessiyalar zamanı layihənin Azərbaycan ali təhsil müəssisələrində tədqiqat məlumatlarının idarə olunması, institusional repozitoriyaların inkişafı və elmi fəaliyyətin rəqəmsallaşdırılması istiqamətində yaratdığı imkanlar geniş şəkildə müzakirə edilib.

Görüş çərçivəsində Xəzər Universiteti tərəfindən hazırlanmış və layihənin əsas nəticələrindən biri hesab olunan Tədqiqat İnformasiya İdarəetmə Sistemi (RIMS) platformasının təqdimatı keçirilib. Platformanın funksionallığı, imkanları və təhlili Xəzər Universitetinin Kompüter elmləri departamentinin müəllimi Hafiz Muhammad Azeem Akram tərəfindən iştirakçılara nümayiş etdirilib.

Tədbirin sonunda Xəzər Universitetinin üçillik layihə fəaliyyəti və əldə edilmiş nəticələr barədə yekun təqdimat Xəzər Universitetinin Kitabxana-İnformasiya Mərkəzinin direktoru Aytac Misgərli tərəfindən təqdim olunub. O, layihə müddətində əldə olunan nailiyyətləri, yaradılmış rəqəmsal həlləri və formalaşdırılmış əməkdaşlıq şəbəkəsinin gələcək inkişaf perspektivlərini iştirakçıların diqqətinə çatdırıb. Tədbir bağlanış nitqi və iştirakçılar arasında fikir mübadiləsi ilə yekunlaşıb.

DIRNA layihəsi Azərbaycan ali təhsil müəssisələrində tədqiqat potensialının gücləndirilməsi, institusional repozitoriyalar şəbəkəsinin formalaşdırılması və elmi fəaliyyətin idarə olunmasında müasir rəqəmsal həllərin tətbiqi istiqamətində mühüm nəticələrin əldə olunmasına töhfə verib.