Xəzər Universitetinin beynəlxalq “Web of Science” bazasında indekslənən “Khazar Journal of Humanities and Social Sciences” jurnalının növbəti nömrəsi (Cild 29, Nömrə 3, 2026) işıq üzü görüb. Nəşrin aparıcı beynəlxalq elmi bazalarda yer alması akademik mühit üçün xüsusi əhəmiyyət kəsb edir, çünki bu jurnal Azərbaycanda humanitar elmlər sahəsində “Web of Science” bazasında indekslənən yeganə elmi nəşrdir.

Jurnalın dil və ədəbiyyat üzrə sahə redaktoru, filologiya üzrə fəlsəfə doktoru Fəridə Seyidovanın bildirdiyinə görə, yeni nömrədəki 13 elmi tədqiqat işindən 9-u beynəlxalq konfransın materialları əsasında seçilmişdir. Həmin 9 məqalə 2025-ci ilin dekabr ayında Xəzər Universitetinin Mövlana Ədəbi-Fəlsəfi Araşdırmalar İnstitutu ilə Şimali Kipr Türk Cümhuriyyətinin Yakın Doğu Universiteti Rumi Araşdırmaları Mərkəzinin birgə təşkilatçılığı ilə keçirilmiş “IX Beynəlxalq Rumi Konqresi”ndə təqdim olunmuşdur. 

Nəşrdə Rumi irsi və təsəvvüf tədqiqatları çərçivəsində Əsmətxanım Məmmədovanın Cəlaləddin Ruminin poetik irsində omonimlərin leksik və mistik qatlarına, Lütfiyyə Əsgərzadənin Hüseyn Cavidin “İblis” dramı nümunəsində türk ədəbiyyatında demonik obrazın təkamülünə, Nihat Değirmencinin “Məsnəvi”dəki “Bədəvi ərəb və arvadı” hekayəsində daxili təhkiyə strukturu və təşbeh şəbəkəsinə, Rəşad Həsənov və Coxa Əl-Harsinin Rumi və Nəsimi poeziyasında məstlik metaforasına, Şəhanə Şahbazovanın Ruminin ərəbcə şeirlərinin mövzu və struktur xüsusiyyətlərinə, Şəbnəm Qolkarianın müqəddəs memarlıqda işıq və səma anlayışlarına, Xatirə Yusifovanın Rumi təfəkküründə nəfs və mənəvi yüksəliş məsələlərinə, Qədir Qolkarianın səma ritualının ritmik-ontoloji mahiyyətinə, eləcə də Zöhrə Əliyevanın XIX–XX əsrlər Azərbaycan maarifçiliyində Şərq-Qərb intellektual dialoquna həsr olunmuş tədqiqatları yer alıb.

Bunlarla yanaşı, jurnalda beynəlxalq və ictimai elmlər istiqamətində Saad Zakria və Azmat Ullahın Pakistandakı əfqan qaçqınları və dövlət təhlükəsizliyi siyasəti, Latifah Abdulgani Abdulrahman Bin Nafisahın Kritik Məkan Nəzəriyyəsi prizmasından İslam hicabının sosial-məkan rolu, Muhammad Ahmad, Muhammad Mushtaq, Maryyam Jabeen və Ali Raza Siddiquenin akademik yazıda leksik-qrammatik xüsusiyyətlərin korpus dilçiliyi analizi və Ümit Akının İdil-Ural mütəfəkkiri Rzaəddin bin Fəxrəddinin irsində qadın mövzusunu təhlil edən məqalələri də nəşr olunub.

Jurnalın elektron versiyası ilə Khazar University Press-in rəsmi saytında tanış olmaq mümkündür (Khazar Journal of Humanities and Social Sciences | Khazar University).