Xəzər Universitetinin Beynəlxalq əlaqələr şöbəsinin təşkilatçılığı ilə birinci kurs beynəlxalq tələbələr və universitetin əməkdaşlarının 2026-cı il oktyabrın 31-də Şamaxı səfəri maarifləndirici və mədəni tədbirlərlə zəngin olub.

Səfərdə Türkiyədən 28, Pakistandan 3, Omandan 1, İraqdan 1 və Çindən 1 olmaqla, ümumilikdə 34 beynəlxalq tələbə iştirak edib. Tədbirə Xəzər Universitetinin təsisçisi,  Direktorlar və Qəyyumlar Şurasının sədri Prof. Akad. Hamlet İsaxanlı, rektor Dr. Raziyə İsayeva, universitet rəhbərliyinin nümayəndələri, fakültə dekanları və universitetin əməkdaşları da qatılıblar.

Səfərin əsas məqsədi beynəlxalq tələbələrin Azərbaycanın tarixi, elmi və mədəni irsi ilə daha yaxından tanış olması, eləcə də universitetin beynəlxalq tələbə icması arasında ünsiyyətin və mədəni inteqrasiyanın gücləndirilməsi olub.

Proqram çərçivəsində iştirakçılar Nəsirəddin Tusi adına Şamaxı Astrofizika Rəsədxanasına səfər ediblər. Burada Azərbaycanın astronomiya sahəsində elmi nailiyyətləri və rəsədxananın fəaliyyəti haqqında məlumatlar əldə ediblər.

Səfərin əlamətdar hadisələrindən biri, Xəzər Universiteti ilə Nəsirəddin Tusi adına Şamaxı Astrofizika Rəsədxanası arasında əməkdaşlıq Memorandumunun imzalanması olub. Memorandum Xəzər Universitetinin rektoru Dr. Raziyə İsayeva və rəsədxananın direktoru professor Namiq Cəlilov tərəfindən imzalanıb. İmzalanma mərasimindən sonra tərəflər qarşılıqlı olaraq xatirə hədiyyələri təqdim edib və birgə xatirə fotosu çəkdiriblər.

Günün davamında iştirakçılar Şamaxının təbiəti və mədəni mühiti ilə tanış olub, birgə nahar və müxtəlif mədəni-əyləncəli fəaliyyətlərdə iştirak ediblər. Proqramın ikinci hissəsində beynəlxalq tələbələr öz ölkələrinin milli musiqilərini, rəqslərini və mədəni ənənələrini təqdim ediblər. Müxtəlif ölkələrin mədəniyyətlərinin nümayiş olunduğu proqram tələbələrə öz milli dəyərlərini bölüşmək, eləcə də fərqli mədəniyyətləri daha yaxından tanımaq imkanı yaradıb.