Xəzər Universiteti İT departamentinin rəhbəri, Azərbaycan Kibertəhlükəsizlik Təşkilatları Assosiasiyasının eksperti Fərid Musayev dünyanın ən böyük kriptovalyuta birjalarından biri olan Binance-də baş vermiş və ilkin qiymətləndirməyə görə 6,3 milyard dollar dəyərində aktivin oğurlanması ilə nəticələnən təhlükəsizlik hadisəsi barədə məlumat verib.

Ekspertin verdiyi məlumata görə, hücum oktyabrın 29-da başlayıb və vəsaitlərin böyük hissəsi təxminən 20 dəqiqə ərzində birjanın cüzdanlarından çıxarılıb. Binance ilkin olaraq DevOps mühəndisinin cihazının ələ keçirildiyini bildirsə də, sonradan hadisənin daha mürəkkəb xarakter daşıdığı açıqlanıb. Analitiklər hücum zamanı Ethereum-un EIP-7702 hesab nümayəndəliyi funksiyasından istifadə edildiyini qeyd edirlər.

Binance istifadəçi vəsaitlərinin təhlükəsiz olduğunu, zərərin SAFU fondu və şirkətin öz vəsaitləri hesabına qarşılanacağını açıqlayıb. Blokçeyn tərəfdaşları ilə əməkdaşlıq nəticəsində təxminən 3 milyard dollarlıq aktivin dondurulduğu bildirilib. Hadisə ilə bağlı araşdırma davam edir, analitik şirkətlər hücumu Şimali Koreya ilə əlaqələndirirlər.

Fərid Musayev istifadəçiləri hadisədən sonra yarana biləcək saxta kompensasiya və hesab bərpası mesajlarına qarşı diqqətli olmağa çağırıb. O, hesab məlumatlarının yalnız birjanın rəsmi sayt və tətbiqi üzərindən yoxlanılmasını, hardware təhlükəsizlik açarı ilə iki faktorlu autentifikasiyadan istifadəni və çıxarış ünvanlarının ağ siyahısına əlavə edilməsini tövsiyə edib.

Mənbə: Valyuta.az