Xəzər Universiteti İT departamentinin rəhbəri, Azərbaycan Kibertəhlükəsizlik Təşkilatları Assosiasiyasının eksperti Fərid Musayev WhatsApp hesablarının birdəfəlik təsdiqləmə kodları (OTP) vasitəsilə ələ keçirilməsi cəhdləri barədə xəbərdarlıq edib.

Ekspert bildirib ki, kiberdələduzlar sosial mühəndislik üsullarından istifadə edərək istifadəçiləri aldadır, guya kodun səhvən göndərildiyini və ya hesabın təhlükəsizliyini təsdiqləmək lazım olduğunu bildirərək OTP kodunu əldə etməyə çalışırlar. Kod paylaşıldıqda hücumçular hesabı öz cihazlarında aktivləşdirə və şəxsi məlumatlara çıxış əldə etməyə cəhd göstərə bilərlər.

Fərid Musayev hesabların təhlükəsizliyini təmin etmək üçün təsdiqləmə kodlarını heç kimlə paylaşmamağı, iki mərhələli təsdiqləməni aktivləşdirməyi və şübhəli keçidlərə daxil olmamağı tövsiyə edib.

Mütəxəssis, həmçinin, WhatsApp-ın “Bağlı cihazlar” bölməsini mütəmadi yoxlamağı, tanınmayan cihazlardan çıxış etməyi və məxfilik parametrlərini düzgün tənzimləməyi vacib hesab edir.

Ekspert vurğulayıb ki, rəqəmsal təhlükəsizliyin qorunması üçün istifadəçilər gözlənilməz kod sorğularına qarşı diqqətli olmalı və şəxsi məlumatlarını heç kimlə paylaşmamalıdırlar.

Mənbə: SİA