2026-cı il oktyabrın 28- də Xəzər Universitetinin Nərimanov kampusunda universitetin Karyera və Məzunlar Mərkəzinin HR Engineering şirkəti ilə əməkdaşlığı çərçivəsində həyata keçirilən “Career Readiness Week – Karyeraya Hazırlıq Həftəsi” layihəsi üzrə INFO DESK təşkil olunub.

Təşəbbüsün əsas məqsədi tələbələrin əmək bazarına hazırlıq səviyyəsini yüksəltmək, onların karyera planlaşdırılması ilə bağlı bilik və bacarıqlarını inkişaf etdirmək, eləcə də peşəkar həyata keçid prosesinə dəstək göstərməkdir.

INFO DESK çərçivəsində tələbələrə üç əsas istiqamət üzrə fərdi məsləhətlər və praktiki tövsiyələr təqdim edilib. CV Clinic bölməsində tələbələrin CV-ləri nəzərdən keçirilib, onların məzmununun və strukturunun təkmilləşdirilməsi ilə bağlı tövsiyələr verilib. LinkedIn Lab çərçivəsində peşəkar onlayn profilin yaradılması və inkişaf etdirilməsi, LinkedIn platformasından karyera imkanlarının genişləndirilməsi məqsədilə istifadə yolları izah olunub. Mock Interview istiqamətində isə tələbələrin iş müsahibələrinə hazırlığına, özünü təqdimetmə və müsahibə bacarıqlarının inkişafına diqqət yetirilib.

Tələbələr tədbirdə fəal iştirak edərək, CV-lərinin təkmilləşdirilməsi, peşəkar profillərinin gücləndirilməsi və işə qəbul prosesinin tələbləri barədə ətraflı məlumat əldə ediblər. Fərdi məsləhətləşmələr onlara mövcud bacarıqlarını qiymətləndirmək, inkişaf etdirməli olduqları istiqamətləri müəyyənləşdirmək və gələcək karyera addımlarını daha məqsədyönlü planlaşdırmaq imkanı yaradıb.

“Career Readiness Week” çərçivəsində INFO DESK-in fəaliyyəti oktyabrın 29-da Xəzər Universitetinin Bakıxanov, oktyabrın 30-da isə Neftçilər kampusunda davam etdiriləcək.

Xəzər Universitetinin Karyera və Məzunlar Mərkəzi tələbələrin karyera inkişafına dəstək göstərmək, onların əmək bazarının tələblərinə uyğun hazırlanmasını təmin etmək və işəgötürənlərlə əməkdaşlığı genişləndirmək məqsədilə praktiki yönümlü təşəbbüsləri davam etdirir. “Career Readiness Week” layihəsi də tələbələrin nəzəri biliklərini praktiki karyera bacarıqları ilə tamamlamağa və onların peşəkar həyata daha hazırlıqlı başlamalarına xidmət edir.