Xəzər Universitetinin əməkdaşları və tələbələri 2026- cı il oktyabrın 27-də VII Mədəniyyətlərarası Dialoq Forumu çərçivəsində keçirilən “Business Dialogue” sessiyasında iştirak ediblər.

Sahibkarlıq, mədəniyyət və beynəlxalq əməkdaşlıq mövzularına həsr olunan sessiyada sahibkarların qeyri-rəsmi diplomatiyada rolu, mədəniyyətlər arasında əlaqələrin qurulması, yaradıcı iqtisadiyyatın inkişafı və beynəlxalq əməkdaşlıq imkanları müzakirə olunub.

Sessiyanın əsas məqsədi müxtəlif ölkələri və sahələri təmsil edən sahibkarlar, sahibkarlıq mühitinin inkişafına töhfə verən şəxslər, dövlət nümayəndələri və siyasətçilər arasında fikir mübadiləsini və əməkdaşlığı təşviq etmək, həmçinin, mədəniyyətin və yeniliklərin davamlı iqtisadi inkişafdakı rolunu vurğulamaq olub.

“Business Dialogue” sessiyası Azərbaycanın beynəlxalq sahibkarlıq, yenilikçilik və yaradıcı iqtisadiyyat sahələrində əlaqələrin qurulması, ölkələrarası əməkdaşlığın genişləndirilməsi və yeni tərəfdaşlıq imkanlarının müəyyənləşdirilməsi baxımından mühüm əhəmiyyət kəsb edir.  

Xəzər Universiteti nümayəndələrinin sessiyada təmsilçiliyi əməkdaş və tələbələrə beynəlxalq müzakirələrdə iştirak etmək, müxtəlif sahələrin təmsilçiləri ilə fikir mübadiləsi aparmaq və yeni əməkdaşlıq imkanları haqqında məlumat əldə etmək imkanı yaradıb.

Bu cür tədbirlər tələbə və əməkdaşların beynəlxalq tədbirlərdə iştirakının genişləndirilməsi, mədəniyyətlərarası anlaşmanın gücləndirilməsi və ölkələr arasında əməkdaşlıq əlaqələrinin inkişafı baxımından əhəmiyyətlidir.