Xəzər Universitetinin Beynəlxalq əlaqələr şöbəsinin təşkilatçılığı ilə Erasmus+ mübadilə proqramı çərçivəsində 2026- cı il 5- 9 oktyabr aralığında Türkiyənin Bartın Universitetinin professoru Prof. Dr. Ferhunde Küçükşen, Qalatasaray Universitetinin Beynəlxalq əlaqələr şöbəsinin Erasmus koordinatoru Melek Akyüz Özdemir və Latviyanın Turiba Universitetinin Beynəlxalq əlaqələr şöbəsinin Erasmus koordinatoru Yashwant Jaiswal Xəzər Universitetində akademik və inzibati heyətin mübadiləsi proqramında iştirak ediblər.

Səfər çərçivəsində təşkil olunan görüşdə Xəzər Universitetinin Beynəlxalq əlaqələr şöbəsinin əməkdaşları və Memarlıq və dizayn departamentinin koordinatoru Nigar Əliyeva iştirak ediblər.

Görüş zamanı Xəzər Universitetinin fəaliyyəti, təhsil proqramları, beynəlxalq əlaqələri, elmi-tədqiqat imkanları və gələcək əməkdaşlıq perspektivləri haqqında təqdimat keçirilib. Daha sonra qonaqlar təmsil etdikləri universitetlərin fəaliyyəti, akademik proqramları və beynəlxalq əməkdaşlıq təcrübələri barədə məlumat veriblər. Müzakirələr zamanı tələbə və akademik heyət mübadiləsi, ikili diplom proqramlarının yaradılması, birgə elmi-tədqiqat layihələrinin həyata keçirilməsi və universitetlər arasında əməkdaşlığın genişləndirilməsi imkanları nəzərdən keçirilib.

Səfərin növbəti günlərində qonaqlar Xəzər Universitetinin mərkəzi kampusu, laboratoriyaları və digər infrastruktur imkanları ilə tanış olublar. Universitetin akademik və elmi mühiti, eləcə də tədris və tədqiqat üçün yaradılmış şərait qonaqların marağına səbəb olub.

Proqram çərçivəsində oktyabrın 9- da Turiba Universitetinin Beynəlxalq əlaqələr şöbəsinin Erasmus koordinatoru Yashwant Jaiswal Xəzər Universitetinin Mərmər zalında tələbələr üçün “Latviyada təhsil imkanları və Erasmus+ mübadilə proqramı” mövzusunda seminar keçib. İqtisadiyyat və Menecment fakültəsi, eləcə də Humanitar, təhsil və sosial elmlər fakültəsinin tələbələri üçün təşkil olunan seminarda Latviyada ali təhsil imkanları, Turiba Universitetinin təhsil proqramları və Erasmus+ mübadilə proqramı vasitəsilə beynəlxalq akademik təcrübə- qazanma yolları haqqında məlumat verilib.

Erasmus+ proqramı çərçivəsində həyata keçirilən bu səfər Xəzər Universitetinin beynəlxalq tərəfdaşlıq əlaqələrinin möhkəmləndirilməsi, akademik mobilliyin təşviqi və yeni əməkdaşlıq istiqamətlərinin müəyyənləşdirilməsi baxımından əhəmiyyətli olub.