2026-cı il 30 sentyabr – 1 oktyabr aralığında  Azərbaycan Milli Elmlər Akademiyasının Əsas binasında Arxeologiya və Antropologiya İnstitutunun təşkilatçılığı ilə görkəmli arxeoloq-alim, ömrünün 56 ilini Qarabağın arxeoloji abidələrinin öyrənilməsinə həsr etmiş professor Hidayət Cəfərovun 80 illik yubileyinə həsr olunmuş “Qarabağ: Arxeoloji mədəniyyətlər qovşağında” mövzusunda beynəlxalq elmi konfrans keçirilmişdir.

Konfransda Azərbaycan arxeologiyasının inkişaf mərhələləri, Qarabağın qədim tarixinin və arxeoloji irsinin öyrənilməsi, bölgədə aparılmış çoxillik arxeoloji tədqiqatların nəticələri, Azərbaycan arxeologiyasında elmi məktəblərin formalaşması, eləcə də professor Hidayət Cəfərovun yarım əsrdən artıq elmi fəaliyyəti və arxeologiya elminə verdiyi töhfələr diqqət mərkəzində olub.

Konfransda AMEA Arxeologiya və Antropologiya İnstitutunun aparıcı elmi işçisi, Xəzər Universitetinin Tarix və arxeologiya departamentinin müəllimi Dr. Yaqub Məmmədov “2025-ci ildə Azərbaycan və Yaponiya birgə paleolit arxeoloji ekspedisiyasının Tağlar mağarasında apardığı çöl-tədqiqat işlərinin nəticələrinə dair” adlı məruzə ilə çıxış etmişdir. AMEA Arxeologiya və Antropologiya İnstitutunun elmi işçisi, Xəzər Universitetinin Tarix və arxeologiya departamentinin müəllimi Ülviyyə Səfərovanın həmmüəllifliyi ilə təqdim olunan məruzdə Dr. Yaqub Məmmədov 2025-ci ildə Azərbaycan-Yaponiya birgə beynəlxalq arxeoloji ekspedisyasının apardığı tədqiqatların nəticələrindən bəhs etmişdir.

Qeyd etmək lazımdır ki, AMEA Arxeologiya və Antropologiya İnstitutunun təşkilatçılığı ilə Tokio Universiteti ilə birgə 2024-cü ildən etibarən Tağlar mağarasında beynəlxalq arxeoloji tədqiqat aparılır,  Dr. Yaqub Məmmədov və Ülviyyə Səfərova bu tədqiqatlarda iştirak edir.