Müasir dövrdə geniş yayılmış kibertəhlükələrdən biri fişinq hücumlarıdır. Kiberdələduzlar saxta elektron məktublar və keçidlər vasitəsilə istifadəçilərin şəxsi məlumatlarını, şifrələrini və bank hesablarına giriş məlumatlarını ələ keçirməyə çalışırlar.

Xəzər Universiteti  İT departamentinin rəhbəri Fərid Musayev BiG.AZ-a açıqlamasında bildirib ki, fişinq hücumlarının aşkarlanması və qarşısının alınması üçün müxtəlif texnoloji vasitələr mövcuddur. Bununla belə, heç bir proqram bütün təhlükələri 100 faiz dəqiqliklə müəyyən edə bilməz.

Ekspertin sözlərinə görə, Gmail və Outlook kimi elektron poçt xidmətlərinin spam filtrləri, eləcə də Google Chrome, Mozilla Firefox və Microsoft Edge brauzerlərinin təhlükəsizlik funksiyaları şübhəli mesaj və keçidlərin aşkarlanmasına kömək edir. VirusTotal platforması vasitəsilə keçid və faylları yoxlamaq da mümkündür.

Fərid Musayev qeyd edib ki, texnoloji vasitələrlə yanaşı, istifadəçilərin diqqətli davranması da mühüm əhəmiyyət daşıyır. Göndərənin elektron poçt ünvanını yoxlamaq, təcili qərar verməyə sövq edən mesajlara ehtiyatla yanaşmaq və şübhəli keçidlərə daxil olmamaq tövsiyə olunur.

O, hesabların təhlükəsizliyini gücləndirmək üçün güclü və fərqli şifrələrdən, şifrə menecerlərindən və ikiaddımlı doğrulama (2FA) funksiyasından istifadə etməyin vacibliyini vurğulayıb. Bank və digər vacib xidmətlərə daxil olarkən mesajlarda göndərilən keçidlər əvəzinə rəsmi tətbiqlərdən və ya sayt ünvanlarından istifadə etmək daha təhlükəsizdir.

Fərid Musayevin sözlərinə görə, kibertəhlükəsizlik yalnız texnoloji vasitələrdən deyil, həm də istifadəçilərin məlumatlılığından və rəqəmsal mühitdə düzgün davranışından asılıdır.

https://big.az/595529-kiberdeleduzlardan-qorunmagin-yollari-hansi-proqramlar-komek-edir.html