Yaponiyanın Saga Universitetinin professoru Motoi Tachibana Xəzər Universitetinə səfəri çərçivəsində universitetin rektoru Dr. Raziyə İsayeva ilə görüşüb. Görüşdə həmçinin, Təbiət elmləri, sənət və texnologiya yüksək təhsil fakültəsinin dekanı Günel Bahəddinova, Təbiət elmləri və mühəndislik fakültəsinin dekanı Fəxrəndə Əfəndiyeva, Fizika və elektronika departamentinin müdiri Fəridə Tatardar və Nəzəri Fizika Mərkəzinin rəhbəri Şahin Məmmədov iştirak ediblər.

Görüş zamanı Xəzər Universiteti ilə Saga Universiteti arasında elmi-tədqiqat və tədris sahələrində əməkdaşlığın genişləndirilməsi məsələləri müzakirə olunub. Tərəflər fundamental və tətbiqi fizika istiqamətlərində birgə tədqiqatların aparılması, alim və tədqiqatçıların qarşılıqlı elmi səfərlərinin təşkili, birgə seminar və elmi tədbirlərin keçirilməsi, elmi layihələrdə əməkdaşlıq imkanlarının araşdırılması, həmçinin, tələbə və müəllimlər üçün akademik mübadilə və birgə tədris təşəbbüslərinin həyata keçirilməsi perspektivlərini müzakirə ediblər. Eyni zamanda, fizika və əlaqəli elm sahələri üzrə tədris prosesində beynəlxalq təcrübənin tətbiqi və akademik əlaqələrin inkişaf etdirilməsi ilə bağlı fikir mübadiləsi aparılıb.

Səfər çərçivəsində 2026-cı il oktyabrın 7- də  Xəzər Universitetində professor Motoi Tachibana tərəfindən “QCD and Compact Stars” (“QCD və Kompakt Ulduzlar”) mövzusunda elmi seminar keçirilib.

Seminarda kvant xromodinamikası (QCD), kompakt ulduzların quruluşu və yüksək sıxlıqlı maddənin fundamental xüsusiyyətləri ilə bağlı elmi məsələlər müzakirə olunub. Professor Motoi Tachibana mövzu üzrə müasir nəzəri yanaşmalar və aktual tədqiqat istiqamətləri haqqında məlumat verib, kompakt ulduzların fizikasının elementar zərrəciklər fizikası ilə əlaqəsini izah edib.

Elmi seminarda Nəzəri Fizika Mərkəzinin əməkdaşları və Xəzər Universitetinin professor-müəllim heyəti iştirak edib. Təqdimatdan sonra mövzu ətrafında geniş fikir mübadiləsi aparılıb və iştirakçıların sualları cavablandırılıb.

Professor Motoi Tachibananın Xəzər Universitetinə səfəri və keçirilən seminar universitetin beynəlxalq akademik əlaqələrinin inkişafı, fundamental fizika üzrə elmi-tədqiqat və tədris əməkdaşlığının genişləndirilməsi, eləcə də gələcək birgə layihələr üçün yeni imkanların yaradılması baxımından əhəmiyyətli olub.