Azərbaycanda süni intellekt çatbotları arasında ChatGPT liderliyini qoruyur. Sentyabr ayında bütün platformalar üzrə onun bazar payı 86,3% təşkil edib. Google Gemini 10,28%, Perplexity isə 2,34% göstərici ilə ikinci və üçüncü yerləri tutub.

Xəzər Universiteti İT departamentinin rəhbəri, Azərbaycan Kibertəhlükəsizlik Təşkilatları Assosiasiyasının eksperti Fərid Musayev bildirib ki, ChatGPT-nin yüksək göstəricisi onun bazara erkən çıxması, güclü brend tanınması və istifadəçilər üçün rahat interfeysə malik olması ilə bağlıdır.

Onun sözlərinə görə, ChatGPT mətn, səs, görüntü və məlumat analizi kimi müxtəlif imkanları bir platformada birləşdirərək, istifadəçilərin digər xidmətlərə keçməsinə ehtiyacı azaldır. Platformanın Microsoft ekosistemi ilə inteqrasiyası və fərdiləşdirilmiş botlardan istifadə imkanları da onun üstünlükləri sırasındadır.

Fərid Musayev qeyd edib ki, gələcəkdə süni intellekt platformaları arasındakı rəqabətdə məlumatların aktuallığı və etibarlılığı, cavabların sürəti, mürəkkəb tapşırıqları həll etmək qabiliyyəti, eləcə də Azərbaycan dilini və yerli konteksti düzgün anlama mühüm rol oynayacaq.

Ekspert həmçinin, vurğulayıb ki, Gemini və Perplexity kimi platformaların Google ekosistemi və internet axtarışı ilə inteqrasiyası onlara müəyyən istifadəçi qrupları arasında üstünlük qazandıra bilər.

https://demokrat.az/news/299604/chatgpt-azerbaycanda-niye-birinci-oldu