Xəzər Universiteti  İT Departamentinin  rəhbəri Fərid Musayev Azərbaycanın beynəlxalq süni intellekt şirkətləri ilə əməkdaşlığının yaratdığı imkanlardan danışıb.

Fərid Musayev Plat.az-a açıqlamasında bildirib ki, bu cür strateji tərəfdaşlıqlar yalnız proqram təminatından istifadəyə deyil, ölkənin rəqəmsal ekosisteminin inkişafına və yerli insan kapitalının gücləndirilməsinə xidmət edə bilər.

Onun sözlərinə görə, süni intellekt modellərinin dövlət xidmətlərinə inteqrasiyası vətəndaşlara daha sürətli və avtomatlaşdırılmış xidmətlərin təqdim edilməsinə, eyni zamanda, dövlət idarəçiliyində səmərəliliyin artırılmasına imkan yarada bilər.

Mütəxəssis beynəlxalq şirkətlərlə əməkdaşlıqda kibertəhlükəsizlik, məlumatların qorunması və texnoloji suverenlik məsələlərinin xüsusi əhəmiyyət daşıdığını vurğulayıb. O həmçinin, yerli mütəxəssislərin qlobal texnologiya şirkətləri ilə birgə fəaliyyətinin ölkənin insan kapitalının inkişafına töhfə verəcəyini qeyd edib.

Fərid Musayevin fikrincə, NVIDIA ilə əməkdaşlıq hesablama infrastrukturu və GPU texnologiyalarının inkişafına, OpenAI ilə tərəfdaşlıq isə süni intellekt modellərinin dövlət xidmətlərinə inteqrasiyasına imkan verə bilər. Müxtəlif texnologiyaların düzgün şəkildə birləşdirilməsi Azərbaycanın regionda rəqəmsal liderliyini gücləndirə bilər.

https://plat.az/ikt/11082-suni-intellekt-nehengleri-ile-emekdasliq-azerbaycani-regional-lidere-cevirecek-aciqlama