Xəzər Universiteti İT Departamentinin rəhbəri Fərid Musayev WhatsApp hesablarının oğurlanması halları, onların bərpası və təhlükəsizliyin təmin edilməsi yolları barədə tövsiyələr verib.

Fərid Musayev Demokrat.az-a açıqlamasında bildirib ki, hesab oğurlandıqda ilk növbədə WhatsApp tətbiqini yenidən quraşdıraraq, telefon nömrəsi vasitəsilə SMS kodu ilə hesaba giriş etməyə çalışmaq lazımdır. Əgər hesabda iki addımlı təsdiqləmə aktivdirsə və PIN kodu məlum deyilsə, bərpa prosesi uzana bilər. Hesaba giriş mümkün olmadıqda isə WhatsApp-ın rəsmi dəstək xidməti ilə əlaqə saxlamaq tövsiyə olunur.

Mütəxəssis hesabların qorunması üçün iki addımlı təsdiqləmənin aktivləşdirilməsini, SMS-lə göndərilən giriş kodlarının heç kimlə paylaşılmamasını və şübhəli linklərə daxil olmamağı vacib hesab edir.

O, həmçinin, “Bağlı cihazlar” bölməsinin mütəmadi yoxlanılmasını, tanınmayan sessiyalardan çıxış edilməsini, SIM kartın nömrə transferi ilə bağlı risklərə diqqət yetirilməsini və tətbiqin yalnız rəsmi mənbələrdən yenilənməsini tövsiyə edib.

Fərid Musayevin sözlərinə görə, bu sadə təhlükəsizlik tədbirlərinə əməl etmək WhatsApp hesablarının ələ keçirilməsi riskini azaltmağa və şəxsi məlumatları qorumağa kömək edə bilər.

https://demokrat.az/news/298848/whatsapp-da-tehluke-hesablar-ogurlanir-hell-yolu-aciqlandi